Алматыда жүкті әйел мен шақалақ қаза тапты: Туыстары әділдік іздейді

Алматыда 32 жастағы жүкті әйел мен оның шақалағы көз жұмған оқиғаға байланысты марқұмның туыстары жан-жақты тексеріс жүргізуді талап етіп отыр. Бұл туралы 31-арнаның «Информбюро» бағдарламасы хабарлады.

Анна Ефименко мамыр айының басында жүктіліктің 32-аптасында өзін жайсыз сезініп, бірнеше рет есінен танып қалған. Алғашында №4 перзентханаға жеткізілген әйелдің жағдайы нашарлаған соң Алматы қалалық перинаталдық орталығына ауыстырылған. Алайда екі күн ішінде алдымен нәрестенің, кейін ананың қайтыс болғаны белгілі болған.

Марқұмның жұбайы Алексей Ефименко дәрігерлер отбасы мүшелеріне жағдайды толық түсіндірмегенін айтады. Ал туыстары дәрігерлердің ауызша мәлімдемелері мен медициналық құжаттардағы мәліметтердің арасында қайшылық бар екенін алға тартты. Олардың сөзінше, құжатта нәрестенің өліміне гипоксия себеп болғаны көрсетілсе, ауызша түсіндіру кезінде асфиксия туралы айтылған. Сондай-ақ олар ота кезінде жатырдың алынғанын кейін білгендерін мәлімдеді.

Алматы қалалық денсаулық сақтау басқармасы дәрігерлер науқасты құтқару үшін барлық қажетті медициналық көмекті көрсеткенін хабарлады. Ведомствоның мәліметінше, науқасқа қатысты шұғыл консилиум өткізіліп, реанимациялық және қарқынды емдеу шаралары жүргізілген. Алайда ана мен баланы аман алып қалу мүмкін болмаған.

Қазіргі уақытта оқиғаға байланысты сараптама жүргізіліп жатыр. Сарапшылар қорытындысынан кейін қылмыстық іс қозғау мәселесі қаралатыны хабарланды.