Трамп Нетаньяхуды балағаттап, Ливандағы соққылар үшін қатаң сынға алды

АҚШ Президенті Дональд Трамп пен Израиль Премьер-министрі Биньямин Нетаньяху арасындағы телефондық келіссөз үлкен жанжалмен аяқталды. Трамп Таяу Шығыстағы бітімгершілік процесінің бұзылуына байланысты израильдік әріптесін балағат сөздермен сынап, қатаң сөгіс жариялады. Бұл туралы дүйсенбі, 1 маусымда америкалық беделді «Axios» порталы өз дереккөздеріне сілтеме жасап хабарлады.

Инсайдерлердің мәліметінше, Ақ үй басшысы эмоцияға бой беріп, Израиль лидерін «ақылдан азған» деп атаған. Трамптың Нетаньяхуға айтқан айыптары тек дипломатиялық шеңберде ғана емес, жеке тұлғалық тарапына да айтылыпты.

Сонымен қатар, АҚШ президенті Израильдің Ливанға жасаған соққылары Нетаньяхудың беделіне нұқсан келтіріп жатқанын қатаң сынай келе:
«Ливандағы әрекеттеріңнен кейін сені бәрі жек көреді» — деп басып айтқан. Трамптың пікірінше, бұл әрекеттер Израильді халықаралық аренадан мүлдем оқшаулап тастайды.

Бейбіт тұрғындардың қазасы Ақ үйді алаңдатып отыр. Жанжалдың ушығуына 1 маусымда Нетаньяхудың Бейруттың оңтүстік маңына соққы беру туралы бұйрығы себеп болды. Израиль тарапы бұл әрекетін Иран қолдайтын «Хезболла» тобымен қақтығыстың шиеленісуімен және Израильдің солтүстік аудандарына жасалған шабуылдарға “жауабы”ретінде түсіндірді.

Алайда Axios дереккөздері Трамптың Ливандағы бейбіт тұрғындар арасындағы шығындардың көптігіне және «Хезболланың» бірнеше командирін көзін жою үшін тұтас тұрғын үй кешендерінің қиратылуына қатты наразы болғанын жеткізді.

Осы оқиғалардың фонында Иранның КСИР (Ислам революциясының сақшылар корпусы) құрылымына жақын “Tasnim” агенттігі Тегеран мен Вашингтон арасындағы жүріп жатқан келіссөздердің тоқтатылғанын хабарлады. Иран билігі Ливандағы соғыстың тоқтауын АҚШ-пен бітімге келудің басты шарты ретінде қарастырған, бірақ соққылардың жалғасуы процесті тежеген.

Дегенмен, Дональд Трамп бұл ақпаратты теріске шығарды. Өзінің “Truth Social” әлеуметтік желісіндегі парақшасында ол Иранмен келіссөздердің «қарқынды түрде жалғасып жатқанын» мәлімдеді. АҚШ президенті Израиль және Ливан тараптарымен өзара соққыларды тоқтату бойынша келісімге қол жеткізгенін, және бұл диалогтың алға жылжуына мүмкіндік беретінін атап өтті.

Таяу Шығыстағы жағдай ушығып тұрған сәтте Вашингтон мен Тель-Авив арасындағы мұндай текетірес аймақтағы геосаяси жағдайды одан сайын қиындата түспек. Бұған дейін берік одақтас болып келген қос көшбасшының дәл қазіргі үзілді-кесілді мәлімдемелері алдағы үлкен өзгерістердің хабаршысы болуы мүмкін.