«Мейлі, өз ойларының келтелігін көрсете берсін»: Тоқаев елімізді «Штрафстан» дейтіндерге жауап берді

Президент Қасым-Жомарт Тоқаев Алматы облысындағы Алатау қаласын дамыту мәселелері жөніндегі кеңесте кейбір депутаттың елдегі құқықтық саясатты «Штрафстан» деп атауын сынға алды.

Мемлекет басшысы заң мен тәртіпке құрмет жазадан қорқу емес, жауапкершілігі жоғары азаматтарға тән қасиет екенін айтты. Оның сөзінше, қазіргі күрделі геосаяси жағдайда Қазақстанға тұрақтылық пен қоғамдық келісім қажет, ал онсыз реформалар мен оң өзгерістер жүзеге аспайды.

Президент сондай-ақ «Таза Қазақстан» тұжырымдамасының маңызын атап өтіп, елді мекендерді абаттандыру, көгалдандыру және экологиялық мәдениетті қалыптастыру жұмыстарына басымдық беру керектігін айтты. Ол туристік орындар мен табиғат аясындағы тәртіпке ерекше назар аударып, вандализмге қарсы заң аясында қатаң шара қолдануды тапсырды.

Сөз барысында Қасым-Жомарт Тоқаев құқық бұзушылықтарға қарсы қабылданып жатқан шараларды «Штрафстан» немесе «Айыппұлстан» деп сипаттайтындарды да сөз етті.

«Кейбір елімізді жақтырмайтын, менсінбейтін кісілер, өкінішке қарай, солардың ішінде Парламент депутаттары бар, құқықтық әрекеттерімізді "Штрафстан", "Айыппұлстан" деп атайды екен. Мейлі, өз ойларының келтелігін көрсете берсін», – деді Президент.

Мемлекет басшысы қоғамдық тәртіп пен қауіпсіздік азаматтардың негізгі сұранысының бірі екенін айтып, билік «Заң мен тәртіп» қағидатына негізделген саясатты жалғастыра беретінін жеткізді.