Алматыда 200-ден астам құрылыс компаниясының лицензиясы тоқтатылды: Қандай заңбұзушылықтар анықталды?

Алматыда 214 құрылыс компаниясының лицензиясы уақытша тоқтатылды. Қала прокуратурасының ұсынысынан кейін қабылданған бұл шешім компаниялардың біліктілік талаптарына сәйкес келмеуіне байланысты болды.

Алматы қаласының Қала құрылысы бақылау басқармасының мәліметінше, құрылыс нормаларына сәйкес келмегені және бекітілген жобалық шешімдерден ауытқуларға жол берген «Отау-Құрмет» ЖШС лицензиясынан айырылған. Сондай-ақ І санаттағы жобалау лицензиясы «SK BEST Spec Story KZ» ЖШС-нен қайтарылып алынды.

Бұдан бөлек, құрылыс талаптарын бірнеше мәрте бұзып, бұған дейін берілген нұсқамаларды орындамаған «Сәулет Құрылыс Консалтингі» ЖШС-не қатысты лицензиядан айыру шарасы қолданылды.

Ал "ҚазҚСҒЗИ" АҚ ЕҰ" ЖШС міндетті талаптардың бірі саналатын өндірістік базасының болмауына байланысты құрылыс қызметін жүзеге асыру лицензиясынан айырылды.

Қала әкімдігі лицензиясы тоқтатылған 214 компания анықталған заңбұзушылықтарды толық жойып, белгіленген талаптарға сәйкестігін дәлелдеген жағдайда ғана қызметін қайта жалғастыра алатынын мәлімдеді.

Айта кетейік, бұған дейін Алматы әкімі Дархан Сатыбалды құрылыс компанияларына қатысты талаптың күшейетінін ескерткен болатын. Ол нысанды мерзімінде әрі сапалы аяқтамаған мердігерлердің жаңа тендерлерге жіберілмейтінін айтып, заңбұзушылық анықталған жағдайда компанияларды лицензиясынан айыру қажеттігін мәлімдеген еді. Әкімнің сөзінше, құрылыс жұмыстарының сапасы мен орындалу қарқыны тұрақты бақылауда болуы тиіс.