Зейнетақы жинақтарын мерзімінен бұрын шешіп алу шектері қашан жарияланады?

Зейнетақы жинақтарын мерзімінен бұрын пайдалану үшін белгіленетін жеткіліктілік шектерінің жаңа мөлшері 5 маусымнан кейін жарияланады. Бұл туралы Бірыңғай жинақтаушы зейнетақы қоры (БЖЗҚ) хабарлады.

Қордың мәліметінше, ең төменгі жеткіліктілік шектерін (ТЖШ) айқындаудың жаңартылған әдістемесі 2026 жылғы 5 маусымнан бастап күшіне енеді. Осыған сәйкес есептелген жаңа шектер аталған күннен кейін үш жұмыс күні ішінде БЖЗҚ-ның ресми ресурстарында жарияланады.

«2026 жылғы 5 маусымнан бастап ең төменгі жеткіліктілік шектерінің жаңа мөлшері қолданысқа енгізіледі. Олар жеткіліктілік шектерін айқындау әдістемесіне сәйкес есептелді. Жаңа көрсеткіштер әдістеме күшіне енген күннен кейін үш жұмыс күні ішінде жарияланады», – деп мәлімдеді БЖЗҚ.

Сондай-ақ қор 4 маусым күнінің соңына дейін берілген өтінімдер бұрынғы жеткіліктілік шектері бойынша қаралатынын атап өтті. Ал 5 маусымнан бастап тапсырылған өтінімдер жаңа талаптарға сәйкес бағаланады.

Бұған дейін Қазақстанның еңбек және халықты әлеуметтік қорғау министрі Асқарбек Ертаев зейнетақы жинақтарын мерзімінен бұрын пайдалану үшін белгіленетін жаңа жеткіліктілік шектерін мамыр айының соңына дейін бекіту жоспарланып отырғанын айтқан болатын.

Министрдің сөзінше, азаматтардың жас ерекшеліктеріне қарай жаңа шектердің мөлшері кейбір санаттар үшін 80 пайызға дейін өсуі мүмкін. Сонымен қатар Еңбек министрлігі бұған дейін 20-35 жас аралығындағы азаматтар үшін жеткіліктілік шектерін шамамен 10 пайызға арттыру мәселесі қарастырылып жатқанын хабарлаған еді.