Қазақстандықтардың жалақысы қанша болу керек: Еңбек министрі ойын айтты

Еңбек және халықты әлеуметтік қорғау министрі Асқарбек Ертаевтың пікірінше, Қазақстандағы лайықты жалақы мөлшері медианалық еңбекақыдан кем болмауы тиіс. Қазіргі таңда оның көлемі 331 527 теңгені құрайды. 

Министрдің пікірінше, медианалық жалақы азаматтардың қалыпты сатып алу қабілетін қамтамасыз етеді. Ал табысы төмен адамдардың қайта даярлаудан өтіп, жалақысы жоғары қызметке орналасуына мүмкіндік бар. 

Оның айтуынша, ең төменгі жалақы өмір сүру құнын дәл көрсете алмайды. Қазір оны алатын шамамен 400 мың адамның көбі толық емес жұмыс күнінде жұмыс істейді. 

Министр ең төменгі жалақыны медианалық жалақымен теңестіруді ұсынбағанын ерекше атап өтті. Оның сөзінше, ведомство ең төменгі жалақыны есептеудің жаңа тәсілдерін әзірлеп жатыр. Бұл мәселе Үкіметтің, Ұлттық банктің және Қаржы нарығын реттеу және дамыту агенттігінің 2027–2028 жылдарға арналған бірлескен жоспары аясында талқыланбақ. 

Ұлттық статистика бюросының деректеріне сәйкес, 2026 жылдың алғашқы тоқсанында елдегі медианалық жалақы 331 527 теңгені, ал орташа айлық атаулы жалақы 461 486 теңгені құраған. Өткен жылдың соңымен салыстырғанда екі көрсеткіш те төмендеген. 

Анықтама: Медианалық жалақы – жұмыскерлердің тең жартысы осы сомадан аз, ал қалған жартысы одан көп табыс алатын көрсеткіш. Ал орташа жалақы барлық қызметкерлердің еңбекақысын қосып, олардың санына бөлу арқылы есептеледі.

Жарылқасын Шұғыла