500 мыңнан астам қазақстандықтың айыппұлы кешірілмек

Қазақстанда әкімшілік амнистия аясында 500 мыңнан астам азаматтың құқық бұзушылығы жеңілдетіледі. Бұл туралы Ішкі істер министрінің орынбасары Санжар Әділов мәлімдеді.

Оның айтуынша, Ішкі істер органдарының құзыретіне жататын Әкімшілік құқық бұзушылық туралы кодекстің 58-бабы амнистия шарасының аясында қарастырылып отыр.

«Алдын ала есеп бойынша жалпы сомасы 17 миллиард теңгеден асатын 1 миллионнан астам айыппұл есептен шығарылады», – деді вице-министр.

Санжар Әділовтың сөзінше, төленбеген айыппұлдары кешірілетін әкімшілік құқық бұзушылықтардың басым бөлігі жол қозғалысы ережелерін бұзуға қатысты. Алайда амнистия заңсыз есірткі және қару айналымына байланысты құқық бұзушылықтарға, сот шешімдерімен байланысты істерге, сондай-ақ қайталанған және қасақана жасалған өрескел құқық бұзушылықтарға қолданылмайды.

Өз кезегінде Қаржы вице-министрі Ержан Біржанов бұл шара кәсіпкерлік субъектілерін де қамтитынын айтты.

«Аталған науқан аясында бірқатар баптар қарастырылып жатыр. Олардың негізінде шамамен 2 370 кәсіпкерлік субъектісі амнистияға ілігуі мүмкін», – деді ол.

Сонымен қатар вице-министр мемлекеттік сатып алу саласындағы құқық бұзушылықтар мен салық салу кезінде объектілерді қасақана жасыру фактілері бойынша жасалған заң бұзушылықтар амнистияға жатпайтынын атап өтті.

Билік өкілдерінің мәліметінше, әкімшілік амнистия азаматтар мен кәсіпкерлердің әкімшілік жауапкершілік жүктемесін азайтуға және құқықтық реттеуді ізгілендіруге бағытталған.