Михаил Шайдоров балаларға берген сөзінде тұрды

Халықаралық балаларды қорғау күніне орай қазақстандық мәнерлеп сырғанаушы, Михаил Шайдоров Алматы қаласындағы №3 балалар мен жасөспірімдер спорт мектебінің тәрбиеленушілерімен кездесті. Кездесу барысында спортшы, жас мәнерлеп сырғанаушыларға спорттық құрал-жабдық алуға арналған сертификаттар табыстады.

Айта кетейік, бұған дейін Михаил Шайдоров өзіне төленбей қалған жалақысын балаларға көмек көрсетуге бағыттауға дайын екенін мәлімдеген болатын. Кездесуден кейін ол әлеуметтік желідегі парақшасында алған әсерімен бөлісті.

«Балаларға жағымды эмоция сыйлап, олардың өз күшіне деген сенімін арттыра алғаныма өте қуаныштымын. Алдағы уақытта да сүйікті спортымыздағы мүмкіндігінше көп балаға қолдау көрсетуге ұмтыламын», – деп жазды Михаил Шайдоров.

Министрліктің мәліметінше, келісімшарт бойынша барлық төлемдер толық көлемде төленеді. Михаил Шайдоров 5 маусымда келесі маусымға дайындық үшін АҚШ-қа аттанады. Сондай-ақ жақын уақытта министрлік өкілдерімен келесі олимпиадалық циклға дайындық мәселелерін талқыламақ.

Еске салайық, бұған дейін Шайдоров 2030 жылғы Олимпиадада міндетті түрде медаль алу талабына байланысты келісімшартқа қол қоюдан бас тартқанын айтып, өзі мен командасының бірнеше ай жалақы алмағанын мәлімдеген еді. Кейін Спортты дамыту дирекциясы төлемдердің кешігуін растап, оны объективті себептермен түсіндірді.