Еуроодақ Қазақстанда босқындар орталығын ашпақ па?

Қазақстан Сыртқы істер министрлігі Еуроодақпен елде босқындар немесе мигранттарды ұстау орталықтарын ашу мәселесі бойынша келіссөз жүргізіп жатқаны туралы ақпаратты жоққа шығарды.

 СІМ ресми өкілі Ерлан Жетібаевтың айтуынша, Қазақстан мен Еуроодақ арасында қазір қазақстандықтар үшін виза талаптарын жеңілдету және реадмиссия туралы келісімдер талқыланып жатыр.

 «Менің білуімше, мұндай келіссөздер жоқ. Біз еуропалық тараппен азаматтарымыз үшін виза талаптарын жеңілдету бойынша жұмыс жүргізіп жатырмыз», – деді ол.

 Жетібаев реадмиссия келісімі заңсыз жолмен шетелге кеткен Қазақстан азаматтарын елге кері қабылдауды көздейтінін түсіндірді.

 Қазақстан мен Еуроодақ арасындағы визалық режимді жеңілдету және реадмиссия жөніндегі ресми келіссөздер былтыр желтоқсанда басталған. Оларды биылғы жылдың екінші жартысында аяқтау жоспарланып отыр.