Қазақстанда зейнетақы жүйесі өзгеруі мүмкін: Өзгерістер маусым айының соңында таныстырылады

Қазақстандағы зейнетақы жүйесін реформалауға қатысты ұсыныстар маусым айының соңына дейін жарияланады. Бұл туралы Үкіметтегі баспасөз мәслихатында Еңбек және халықты әлеуметтік қорғау министрі Асқарбек Ертаев мәлімдеді.

Министрдің айтуынша, жұмыс тобы қазіргі уақытта зейнетақы реформасының үш нұсқасын қарастырып жатыр. Ұсыныстар талқыланып болған соң, ай соңында қандай өзгерістер енгізілетіні белгілі болады.

Қарастырылып жатқан бастамалардың бірі – Бірыңғай жинақтаушы зейнетақы қорында жұмыс берушілер аударатын 5 пайыздық жарнаға қатысты «4+1» қағидатын енгізу. Бұл жағдайда жарнаның 4 пайызы қызметкердің жеке шотына, ал 1 пайызы ортақ қорға бағытталады. Министрдің сөзінше, бұл тетік азаматтарды 80 жастан кейінгі кезеңде зейнетақымен қамтамасыз етуге мүмкіндік береді.

Екінші ұсынысты Мемлекеттік әлеуметтік сақтандыру қоры енгізген. Ол сақтандыру сыйақысы тетігін қарастырады. Ал үшінші бастаманы сенатор Амангелді Нұғманов ұсынған. Бұл нұсқа бойынша азаматтарға 40 жыл еңбек өтілінен кейін зейнетке шығу мүмкіндігін беру көзделіп отыр.