Қырғызстан алғаш рет БҰҰ Қауіпсіздік Кеңесінің тұрақты емес мүшесі болып сайланды

Қырғызстан тарихында алғаш рет Біріккен Ұлттар Ұйымының Қауіпсіздік Кеңесіне тұрақты емес мүше болып сайланды. Дауыс беру 3 маусым күні БҰҰ Бас Ассамблеясында өтті.

Азия-Тынық мұхиты өңіріне бөлінген орын үшін Қырғызстан мен Филиппин бәсекеге түсті. Алғашқы үш турда екі елдің ешқайсысы қажетті дауыс санын жинай алмады. Төртінші турда Қырғызстан 142 мемлекеттің қолдауына ие болып, жеңіске жетті.

Республика Қауіпсіздік Кеңесіндегі екі жылдық өкілеттік мерзімін 2027 жылдың 1 қаңтарынан бастайды.

Осылайша Қырғызстан БҰҰ Қауіпсіздік Кеңесіне сайланған алғашқы кезеңін бастамақ. Бұған дейін Орталық Азия мемлекеттері арасында бұл органға тек Қазақстан ғана мүше болған. Қазақстан Қауіпсіздік Кеңесінің тұрақты емес мүшесі ретінде 2017–2018 жылдары жұмыс істеді.

Қасым-Жомарт Тоқаев Президент Садыр Жапаровты және қырғыз халқын бауырлас елдің 2027-2028 жылдары БҰҰ Қауіпсіздік Кеңесінің тұрақты емес мүшесі болып сайлануымен құттықтады:

– Бұл айтулы оқиға Қырғызстан және тұтас Орталық Азия елдері үшін тарихи мәнге ие. Қырғыз Республикасы Президентінің басшылығымен жүргізіліп отырған жасампаз әрі сындарлы саясаттың нәтижесінде Қырғызстанның халықаралық аренадағы беделі жоғары деңгейде танылды. Қазақстан Қырғыз Республикасының кандидатурасын дәйекті түрде қуаттады әрі осы жауапты миссияны атқаруда алдағы уақытта жан-жақты қолдау көрсетуге дайын. Қырғызстанның БҰҰ Қауіпсіздік Кеңесіндегі жұмысына табыс тілеймін! – деп жазылған жеделхатта.

Сайлауалды науқан барысында Қырғызстан халықаралық аренада шағын мемлекеттердің, таулы елдердің және теңізге шығатын жолы жоқ мемлекеттердің мүдделерін белсендірек қорғауға уәде берген болатын.

БҰҰ Қауіпсіздік Кеңесі халықаралық бейбітшілік пен қауіпсіздікті қамтамасыз етуге жауапты ұйымның негізгі органы саналады. Оның құрамына бес тұрақты мүше – АҚШ, Ресей, Қытай, Франция және Ұлыбритания кіреді. Сонымен қатар екі жылдық мерзімге сайланатын он тұрақты емес мүше бар.