Хакерлер жасанды интеллект арқылы Instagram аккаунттарды бұзып алған

Meta компаниясы Instagram аккаунттарына рұқсатсыз қол жеткізуге мүмкіндік берген Meta AI чат-ботындағы осалдықты жойғанын мәлімдеді. Бұл туралы BBC-дің орыс қызметі хабарлады. 

Компанияның мәліметінше, хакерлер жүйедегі олқылықты пайдаланып, орналасқан жері туралы деректерді қолдан өзгерткен. Осыдан кейін олар Meta AI көмегімен аккаунтқа байланыстырылған электрондық пошта мекенжайын ауыстырып, пайдаланушы парақшасын өз бақылауына алған. 

Қазіргі уақытта қанша аккаунттың зардап шеккені белгісіз. Дегенмен бұзылғандардың арасында АҚШ-тың бұрынғы президенті Барак Обаманың верификацияланған аккаунты болғаны айтылып отыр. 

Бұл мәселе туралы алғашқылардың бірі болып Meta-ның бұрынғы қызметкері Джейн Манчун Вонг хабарлады. Оның айтуынша, аккаунтының құпиясөзі рұқсатынсыз өзгертілген, ал оған дейін құпиясөзді қалпына келтіру әрекеттері туралы бірнеше хабарлама келіп тұрған. 

Компания өкілі Энди Стоунның айтуынша, осалдық анықталғаннан кейін бірнеше күн ішінде жойылған. Қазір Meta зардап шеккен аккаунттарды қорғау жұмыстарын жүргізіп жатыр. Дегенмен компания әлемдік көшбасшылардың парақшалары бұзылды деген ақпаратқа қатысты пікір білдіруден бас тартты. 

Өткен аптада Еуроодақтағы тәуелсіз бақылау органы Meta-ны қолданушылардың негізсіз бұғатталған аккаунттар жөніндегі шағымдарын қарауда тиімсіз жұмыс істейді деп сынға алған болатын.

Жарылқасын Шұғыла