Елімізде бала тууына және күтіміне байланысты төленетін жәрдемақылар көлемі белгілі болды

Еңбек және халықты әлеуметтік қорғау министрлігі Қазақстандағы отбасыларға төленетін негізгі жәрдемақылар мен әлеуметтік төлемдердің мөлшерін жариялады. Ведомство мәліметінше, елде балалы отбасыларға арналған бес негізгі қолдау түрі қарастырылған.

Бала туған кезде бірінші, екінші және үшінші балаға 164 350 теңге көлемінде біржолғы жәрдемақы төленеді. Төртінші және одан кейінгі балалар үшін төлем мөлшері 272 475 теңгені құрайды.

Жұмыс істейтін әйелдерге жүктілік пен босануға байланысты табысынан айырылған жағдайда әлеуметтік төлем беріледі. Оның көлемі соңғы 12 айдағы орташа табысқа байланысты есептеледі. Биылғы 1 мамырдағы жағдай бойынша бұл төлемнің орташа мөлшері 1,2 миллион теңгеге жеткен.

Сондай-ақ жұмыс істейтін аналарға бала 1,5 жасқа толғанға дейін күтім жасау кезеңінде әлеуметтік төлем қарастырылған. Ол соңғы екі жылдағы орташа айлық табыстың 40 пайызы мөлшерінде есептеледі. 1 мамырдағы дерек бойынша мұндай төлемнің орташа көлемі 86 062 теңгені құрады.

Мемлекет көпбалалы отбасыларға да қолдау көрсетеді. Төрт баласы бар отбасылар ай сайын 69 330 теңге алса, бес балалы отбасыларға – 86 673 теңге, алты балалы отбасыларға – 104 017 теңге, жеті балалы отбасыларға – 121 360 теңге төленеді. Бұдан бөлек, «Алтын алқа» және «Күміс алқа» иегерлеріне арнайы жәрдемақы қарастырылған.

Ерекше қажеттілігі бар бала тәрбиелеп отырған отбасыларға ай сайын 81 871 теңге көлемінде жәрдемақы беріледі.