Қазақстан жасанды интеллектіні енгізу деңгейі бойынша әлемнің үздік 30 елі қатарына енді

Қазақстан жасанды интеллектіні (AI) қолдану және енгізу деңгейі бойынша әлемдік рейтингте 30-орынға тұрақтады. Бұл туралы OpenAI компаниясы өкілдерінің Қазақстан  Республикасының Жасанды интеллект және инновациялар министрі Жасұлан Мәдиевпен кездесуі барысында мәлім болды.

OpenAI халықаралық білім беру бағытының жетекшісі Валери Фоккенің айтуынша, Қазақстандағы ChatGPT және басқа да жасанды интеллект құралдарын пайдалану деңгейі халықаралық көрсеткіштермен салыстырғанда жоғары.

«Қазақстанда жастар жасанды интеллект технологияларын белсенді қолданады. Сонымен қатар, технологияларға қолжетімділік ерлер мен әйелдер арасында салыстырмалы түрде тең бөлінген. Ендігі міндет – азаматтардың жасанды интеллект мүмкіндіктерін тиімді пайдалануына жағдай жасау», – деді ол.

Компания ұсынған мәліметтерге сәйкес, Қазақстан көршілес мемлекеттерден айтарлықтай озық нәтиже көрсеткен. Мәселен, Қырғызстан рейтингте 52-орында болса, Өзбекстан 58-орынға жайғасқан.

Пайдаланушылардың сұраныс құрылымына келсек, хабарламалардың 42 пайыздан астамы сұрақ қою немесе ақпарат сұрау сипатында болады. Ал 32 пайызы нақты тапсырмаларды орындауға бағытталса, 26 пайызы өзін-өзі білдіру мен шығармашылық мақсаттарға арналған.

Зерттеу нәтижелері жасанды интеллектіні ең белсенді қолданатын топ 18–24 жас аралығындағы жастар екенін көрсетті. Олар барлық пайдаланушылардың 36,2 пайызын құрайды.

Сарапшылардың пікірінше, Қазақстандағы цифрлық технологиялардың қарқынды дамуы мен жастардың жаңа құралдарды тез меңгеруі елдің жасанды интеллект саласындағы позициясын одан әрі нығайтуға мүмкіндік береді.