Елімізде шетелдік маркетплейстерден алынатын тауарларды декларациялау міндеттелді

Мәжіліс депутаттары «Қазақстан Республикасындағы кедендік реттеу туралы» кодекске өзгерістер мен толықтырулар енгізу туралы заңды қабылдады. Құжат шетелдік интернет-платформалар арқылы сатып алынатын тауарларды міндетті декларациялау нормаларын ұлттық заңнамаға енгізуді көздейді. 

Заңға сәйкес, электрондық сауда операторы ұғымы енгізіледі. Ол электрондық сауда тауарларын жеткізумен айналысады. Сонымен қатар электрондық сауда декларациясы атты кедендік декларацияның жаңа түрі пайда болады. Ұлттық экономика министрінің міндетін атқарушы Азамат Әмриннің айтуынша, шетелдік интернет-дүкендер мен маркетплейстерден жеке тұлғалар сатып алатын тауарлар «электрондық сауда тауарлары» деген жеке санатқа бөлінеді. Бұл тауарлар тек жеке пайдалануға арналған және кәсіпкерлік қызмет үшін қолданылмайды. 

Қазіргі таңда мұндай тауарлар тек бажсыз әкелу нормасы асқан жағдайда ғана декларацияланады. Жаңа өзгерістер күшіне енгеннен кейін электрондық сауда арқылы сатып алынған барлық тауар есепке алынатын болады. Министрліктің пікірінше, бұл шара қазақстандықтардың шетелдік интернет-платформалардан сатып алатын тауарлары туралы толық статистика жүргізуге мүмкіндік береді. 

Айта кетейік, аталған нормалар бұған дейін Еуразиялық экономикалық одақтың Кеден кодексіне енгізілген болатын. Енді олар Қазақстан заңнамасында да бекітілді.

Жарылқасын Шұғыла