Анталияда жойқын торнадо болды

2024 жылы 5 наурызда Түркияның Анталия провинциясында орналасқан жағалаудағы Кумлуджа қаласында жойқын торнадо болды, деп хабарлайды qrnews.kz тілшісі Anadolu агенттігіне сілтеме жасап.

Торнадо салдарынан алты адам зардап шегіп, жылыжайлар мен ауылшаруашылық жерлер бүлінді.

Түркияның бүкіл дерлік Жерорта теңізі жағалауы табиғат апатына ұшырады. Бірқатар елдімекендерде жауын-шашын салдарынан су тасқыны орын алса, кей жерлерде көшелерді су басты.

Полиция, өрт сөндіру қызметі және Төтенше жағдайлар басқармасының топтары қалада келеңсіз жағдайлардың алдын алу үшін жұмыс істеуде.

Қаланың шығыс аудандары: Ақсу, Серік, Манавгат, Ибрады, Аксеки, Гүндогмуш және Алания аудандарында қатты жаңбыр жауады деп хабарланды. Кенеттен болатын су тасқыны, найзағай, бұршақ, торнадо қаупінен сақ болу ескертілді.

Метеорологиялық қызмет Анталия мен Мугла үшін қызғылт сары қауіп деңгейін жариялады.