АҚШ Жоғарғы соты Трампқа президенттік сайлауға қатысуға рұқсат берді

АҚШ Жоғарғы соты Колорадо сотының бұрынғы президент Дональд Трамптың осы штаттағы президенттік сайлауға түсуіне тыйым салған шешімін жойды. АҚШ-тың Жоғарғы соты 4 наурызда Жоғарғы соттың тоғыз судьясы Трамптың апелляциялық шағымын бірауыздан қолдағанын мәлімдеді.

Шешім Колорадоға ғана емес, барлық штаттарға қатысты. Бұл шешім бұған дейін Дональд Трамптың сайлауға қатысуына тыйым салған Мэн және Иллинойс штаттарында да жүреді. Республикалық партиядан қарашада өтетін сайлауға қатысуға басты үміткер болып табылатын экс-президент АҚШ Жоғарғы сотының шешімін «Америка үшін үлкен жеңіс» деп атады.

Дональд Трамп қаңтар айының басында АҚШ Жоғарғы сотына Колорадо Жоғарғы сотының 2023 жылғы 19 желтоқсандағы оны штаттағы Республикалық партияның 2024 жылдың 5 наурызына белгіленген алғашқы сайлауға қатысу құқығынан айыру туралы шешіміне шағымданды. 

«Колорадо Жоғарғы сотының шешімі Колорадодағы миллиондаған сайлаушыларды конституциялық емес түрде сайлау құқығынан айырады және бүкіл ел бойынша ондаған миллион сайлаушыларды сайлау құқығынан айыру үлгісі ретінде пайдаланылуы мүмкін», - деді Трамптың адвокаттары өтініште.

Колорадо Жоғарғы соты ел Конституциясының 14-ші түзету негізінде Дональд Трамптың праймериз сайлауына қатысуына тыйым салды. Ол бойынша көтеріліске қатысқан адамдар азаматтық және әскери мемлекеттік қызметтерді атқару құқығынан айырылады. 2021 жылдың қаңтарында АҚШ-тың экс-президентінің жақтастарының Капитолийге басып кіруін судьялар көтеріліс деп бағалады. Трамптың өзі Капитолийді басып алуға қатысы бар екенін жоққа шығарады.

5 наурызда Америка Құрама Штаттарында «Супер сейсенбі» деп аталатын күн өтеді, онда партиялардың праймериздері бір уақытта 15 штатта және бір арал аумағында өтеді. Оның нәтижелері Трамп пен оның жалғыз қарсыласы Никки Хейли арасындағы текетіресте шешуші болуы мүмкін. Егер экс-президент бұл шараларда жеңіске жетсе, 20 наурызға қарай ол республикалық дауыстар үшін күресте толық жеңіске жеткенін жариялай алады. 3 наурызда Трамп Вашингтондағы праймеризде жеңілген болатын.