Жасанды интеллект сіздің орныңызға билет сатып алып, шығындарыңызды бақылайды

Жасанды интеллект саласындағы бәсекеде Meta компаниясы кезекті сенсациялық қадам жасауға дайындалып жатқан сияқты. Әлеуметтік желі гиганты пайдаланушылардың күнделікті тапсырмаларын толықтай өз мойнына алатын Muse from Meta деп аталатын жаңа ЖИ-агентін әзірлеп шығарды. Ішкі тестілеуден өткен бұл қосымша қазіргі уақытта жабық альфа-нұсқада сынақтан өтуде, ал алдағы уақытта тұтынушыларға күту парағы (waitlist) арқылы қолжетімді болуы мүмкін.

сурет авторы:  testingcatalog.com

Apple App Store дүкенінде байқалған Muse қосымшасының сипаттамасы мен скриншоттары жасанды интеллекттің мүмкіндіктері шексіз болатынын аңғартады. Meta бұл ЖИ-агентті смартфондағы барлық дерлік әрекеттерді орындай алатын деңгейге жеткізуді көздеп отыр. Ол пайдаланушының атынан хабарлама жіберу, билет бағаларын бақылап, оларды брондау және түрлі сатып алуларды жүзеге асыру сияқты функцияларды орындайды.

Бұған қоса, Muse құралы Gmail, Google Календарь, Peloton және HealthEx сияқты танымал сервистермен біріктіріледі. Тіпті бұл ЖИ-агент пайдаланушының банктік құралдары мен төлем жүйелеріне қосылып, шығындарды бақылауға, ақша үнемдеу үшін артық жазылымдарды жоюды ұсынуға мүмкіндік алады. Дегенмен компанияның жеке деректердің құпиялылығына қатысты бұған дейінгі даулы беделін ескерсек, пайдаланушылардың өз банктік мәліметтерін Meta-ның жасанды интеллектіне қаншалықты сеніп тапсыратыны әлі де үлкен сұрақ болып қалып отыр.