Республика күні қарсаңында Тарбағатайда бірнеше әлеуметтік нысан пайдалануға берілді

Республика күні қарсаңында Тарбағатай ауданының Ақжар, Маңырақ, Қабанбай және Жаңалық ауылдарында бірқатар әлеуметтік нысан пайдалануға берілді. Олардың қатарында күрделі жөндеуден өткен медициналық-санитарлық алғашқы көмек орталығы, жаңа медициналық және ветеринариялық пункттер бар.

Ақжар ауылындағы Тарбағатай аудандық ауруханасының медициналық-санитарлық алғашқы көмек орталығы күрделі жөндеуден кейін қайта ашылды. Ғимаратта тұрғындарға медициналық қызмет көрсетуге қажетті жағдай жасалған. Емхана бөлімшесімен қатар мұнда балалардың өсуі мен дамуын бақылауға арналған «Даму және ерте араласу орталығы» жұмыс істейді.

Сонымен бірге Ақжар, Маңырақ және Қабанбай ауылдарында жаңа ветеринариялық пункттер ашылды. Соңғы жылдары ауданда ветеринариялық қызметтің материалдық-техникалық базасын нығайтуға бағытталған бірқатар жұмыс жүргізілген.

2024 жылы облыстық бюджет есебінен аудандағы сібір жарасына байланысты сегіз көмінді талапқа сай бетон қоршаумен қоршалды. 2025 жылы ветеринариялық қызметке бір жүк көлігі, залалсыздандыру жұмыстарына арналған бір ДУК көлігі және тоғыз жаңа «Соболь» арнайы көлігі берілді.

Аудандық бюджет қаражатына Ақжар ауылдық округінде мал қорымы салынды. Бұдан бөлек, сегіз ауылдық округте малды қамап ұстауға, егуге, емдеуге және алдын алу шараларын жүргізуге арналған арнайы орындар қарастырылды. Бұл нысандар ветеринариялық шараларды ауылдарда тұрақты жүргізуге мүмкіндік береді.

Ақжар ауылдық округіне қарасты Жаңалық ауылында да жаңа медициналық пункт пайдалануға берілді. Тарбағатай ауданы қайта құрылғаннан бері өңірдің денсаулық сақтау инфрақұрылымын жаңарту бағытында бірқатар жоба жүзеге асырылған.

«Ауылдық денсаулық сақтауды жаңғырту» ұлттық жобасы аясында ауданда тоғыз медициналық пункт салынып, халық игілігіне берілді. Аудандық аурухананың жұқпалы аурулар бөлімшесі мен перзентхана ғимараты, Құйған және Тұғыл ауылдарындағы дәрігерлік амбулаториялар күрделі жөндеуден өтіп, қажетті құрал-жабдықпен қамтылды.

Сондай-ақ Сарыөлең, Шеңгілді, Жаңатілеу және Тәуке ауылдарындағы медициналық пункттер жаңартылды. Осылайша ауданда ауыл тұрғындарына медициналық көмекті тұрғылықты жеріне жақын маңда көрсетуге қажетті инфрақұрылымды кезең-кезеңімен жаңарту жұмыстары жалғасып келеді.

Жаңа нысандардың ашылуына Тарбағатай ауданының әкімі Дархан Шомпайұлы, аудан әкімінің орынбасарлары, тиісті сала мамандары мен ауыл тұрғындары қатысты. Сондай-ақ шараға облыстық ветеринария басқармасының өкілі Ерлік Ордабаев қатысты.

Салтанатты шара барысында аудан әкімі тұрғындарды Республика күнімен және жаңа нысандардың ашылуымен құттықтады. Ауыл ақсақалдары бата беріп, жаңа медициналық және ветеринариялық нысандардың жұмысына сәттілік тіледі.