Отбасыңыз А, В әлде C санатында ма? eGov-та жаңа калькулятор іске қосылды

Қазақстандықтар енді отбасының әл-ауқат деңгейін eGov Mobile арқылы алдын ала есептей алады. Қосымшада отбасының тұрмыс деңгейін бағалайтын жаңа калькулятор іске қосылды, деп хабарлады Еңбек және халықты әлеуметтік қорғау министрлігі. 

Жаңа қызмет 2027 жылғы 1 қаңтардан бастап кейбір мемлекеттік көмекті отбасының нақты жағдайы мен мұқтаждығына қарай тағайындау тәртібіне көшуге байланысты енгізілген. Калькулятор арқылы азаматтар бағалау талаптарымен танысып, отбасының әл-ауқат деңгейін анықтай алады. 

Бағалау кезінде тек отбасының табысы мен мүлкі есепке алынбайды. Отбасы құрамы, балалардың, қарт адамдардың және мүгедектігі бар адамдардың болуы сияқты әлеуметтік жағдайлар да ескеріледі. Министрліктің жаңа сервис туралы хабарламасында есеп алты бағыт бойынша 59-дан астам көрсеткішке сүйенетіні айтылған. 

Нәтижесінде отбасының тұрмыс деңгейі А, В, C, D немесе E санаттарының біріне сәйкес келуі мүмкін. А – әл-ауқаты жоғары, В – ауқатты, C – тұрмыс деңгейі қанағаттанарлық, D – экономикалық тұрғыдан осал, ал E – экономикалық және әлеуметтік тұрғыдан осал отбасыларды білдіреді. 

Бірақ калькулятор көрсеткен нәтиже ресми санат та, жәрдемақы тағайындау туралы шешім де емес. Есепті азамат өзі енгізген мәліметтер негізінде алады және ол тек ақпараттық сипатта. Сондықтан калькулятордағы нәтиже әлеуметтік төлемді тағайындауға немесе тоқтатуға өздігінен негіз болмайды. 

2027 жылдан жекелеген мемлекеттік жәрдемақыларды тағайындағанда отбасының мұқтаждығы ескеріледі. Министрліктің түсіндіруінше, А және В санатындағы отбасыларға мұқтаждыққа байланысты бірқатар төлем тағайындалмайды. C, D және E санатындағы отбасылар тиісті талаптарға сай келсе, мұндай мемлекеттік қолдауды алу құқығын сақтайды. Ал қалған 22 мемлекеттік жәрдемақыны тағайындау тәртібіне бұл өзгеріс әсер етпейді.