Шетелге жұмысқа шақырса, нені тексеру керек? Еңбек министрлігі түсіндірді

Қазақстандықтарға шетелде жоғары жалақысы бар жұмыс ұсынып, ақша талап ететін күмәнді делдалдардан сақ болу ескертілді. Еңбек және халықты әлеуметтік қорғау министрлігінің Көші-қон комитеті мұндай ұсыныстардың көбі шетелдегі делдалдар мен күмәнді ұйымдардан түсетінін хабарлады.

Комитеттің мәліметінше, мұндай ұйымдардың бір бөлігі Қазақстанда тіркелмеген және ел заңнамасынан тыс жұмыс істейді. Сондықтан олардың ұсынысына келіскен азамат ақшасынан айырылып қана қоймай, шетелде құқықтық қорғаныссыз қалуы мүмкін.

Мұндай тәсілмен жұмыс ұсынатын адамдар мен ұйымдар көбіне Қазақстаннан тыс жерде болады. Сол себепті зардап шеккен азаматтардың құқығын қорғау және жоғалған ақшаны қайтару қиынға соғады.

Министрлік интернеттегі кездейсоқ жұмыс туралы хабарландыруларға бірден сенбеуге және күмәнді жұмысқа орналастырушы адамдарға алдын ала ақша аудармауға шақырды.

Шетелге жұмысқа баруды жоспарлаған азаматтарға жұмыс беруші мен делдал туралы мәліметті, еңбек шартының талаптарын, жұмыс істеуге қажетті рұқсаттар мен басқа құжаттарды алдын ала тексеру ұсынылады. Министрлік шетелде қауіпсіз жұмысқа орналасу үшін ресми әрі тиісті рұқсаты бар операторларға жүгіну керегін ескертті.