Қазақстан Газаны қалпына келтіруге үлес қосуға дайын екенін мәлімдеді

Қазақстан Газадағы жағдайды тұрақтандыруға және оны қалпына келтіруге, соның ішінде азаматтық инфрақұрылым, азық-түлік қауіпсіздігі және цифрландыру бағыттары бойынша үлес қосуға дайын. Бұл туралы Қазақстанның БҰҰ жанындағы Тұрақты өкілі Қайрат Омаров БҰҰ Қауіпсіздік Кеңесінің Таяу Шығыстағы ахуалға арналған ашық пікірталасында мәлімдеді.

Қазақстан тарапы гуманитарлық көмектің кедергісіз жеткізілуі, бейбіт тұрғындарды қорғау және Газаны қалпына келтіру қажеттігіне назар аударды. Сондай-ақ БҰҰ мен Палестиналық босқындарға көмек көрсету және жұмыстарды ұйымдастыру жөніндегі Таяу Шығыс агенттігінің (UNRWA) маңызды рөлі атап өтілді.

Газадағы азық-түлік қауіпсіздігін қамтамасыз етуге көмектесу үшін штаб-пәтері Астанада орналасқан Азық-түлік қауіпсіздігі жөніндегі Ислам ұйымының мүмкіндігін пайдалану ұсынылды.

БҰҰ Қауіпсіздік Кеңесінің отырысында Қазақстан Таяу Шығыстағы қақтығыстарды саяси және дипломатиялық жолмен реттеуге шақырды. Ел екі мемлекет қағидаты негізіндегі шешімді және осы бағыттағы Нью-Йорк декларациясын қолдайтынын растады.

Сонымен қатар Қазақстанның Ибраһим келісімдеріне қосылу ниеті айтылды. Қазақстан бұл келісімдерді БҰҰ аясындағы екі мемлекет қағидатына негізделген саяси үдеріске ықпал ететін қосымша алаң ретінде қарастыратынын жеткізді.

Қазақстан барлық тарапты ұстамдылық танытып, диалог пен дипломатияға басымдық беруге шақырды.

БҰҰ Қауіпсіздік Кеңесінің Грекия төрағалық еткен отырысы Таяу Шығыстағы жағдайға, оның ішінде Палестина мәселесіне арналды. Ашық пікірталасқа 70 спикер қатысты.