Бала туғандағы төлем кімге беріледі: А-дан Е-ге дейінгі санаттар бойынша түсіндірме

Қазақстанда отбасының тұрмыс деңгейіне қарай бала туған кезде берілетін мемлекеттік жәрдемақыны тағайындау тәртібі өзгереді. А және В санатындағы отбасыларға республикалық бюджеттен төленетін бала тууына байланысты біржолғы жәрдемақы берілмейді. Алайда ресми жұмыс істеген әйелдер Мемлекеттік әлеуметтік сақтандыру қорынан төленетін әлеуметтік төлемдерін сақтап қалады. Бұл туралы еңбек және халықты әлеуметтік қорғау министрі Асқарбек Ертаев Орталық коммуникациялар қызметіндегі баспасөз мәслихатында айтты.

А және В санатындағы жұмыс істейтін аналар. Егер әйел бала туғанға дейін ресми жұмыс істеп, ол үшін әлеуметтік аударымдар жасалса, Мемлекеттік әлеуметтік сақтандыру қорынан төленетін төлемдер сақталады. Бірақ отбасы А немесе В санатына жатса, республикалық бюджеттен берілетін бала тууына байланысты біржолғы мемлекеттік жәрдемақы тағайындалмайды.

C, D және E санатындағы жұмыс істейтін аналар. Мұндай отбасылар мемлекеттік қолдауды екі көзден ала алады: республикалық бюджеттен берілетін жәрдемақылар және Мемлекеттік әлеуметтік сақтандыру қорынан төленетін әлеуметтік төлемдер.

Ал жұмыс істемейтін аналар ше? Олар үшін мемлекеттік жәрдемақы алу отбасының қай санатқа жататынына байланысты болады. Яғни әлеуметтік аударымдары болмағандықтан, Мемлекеттік әлеуметтік сақтандыру қорынан жұмыс істейтін азаматтарға арналған төлемдер қарастырылмайды, ал бюджеттен берілетін жәрдемақы отбасының тұрмыс деңгейіне қарай тағайындалады.

Министрдің айтуынша, бала күтіміне байланысты демалыстан мерзімінен бұрын жұмысқа шығу Мемлекеттік әлеуметтік сақтандыру қорынан төленетін төлемді тоқтатуға негіз болмайды. Яғни ана жұмысқа ертерек оралса да, тиісті әлеуметтік төлемін ала береді.

Ер адамдар да бұрынғыдай бала күтіміне байланысты демалыс рәсімдей алады. Алайда министрдің түсіндіруінше, бұл жағдайда анаға арналған жәрдемақыны әкесінің атына ауыстырып төлеу қарастырылмайды.

Қысқаша