30 мыңнан астам қазақстандық әйел бала күтіміне берілетін жәрдемақыдан қағылуы мүмкін

2027 жылғы 1 қаңтардан бастап жұмыс істемейтін әйелдерге бала бір жарым жасқа толғанға дейін берілетін жәрдемақыны тағайындау кезінде отбасының материалдық жағдайы ескеріледі. Өзгеріс А және В санатындағы 30 мыңнан астам қазақстандық әйелге қатысты болуы мүмкін. Бұл туралы Құрылтай депутаты Ләззат Қожахмет айтты.

Депутаттың сөзінше, ресми жұмыс істейтін әйелдерге бұл өзгеріс әсер етпейді. Олар Мемлекеттік әлеуметтік сақтандыру қорынан бала бір жарым жасқа толғанға дейін бұрынғы тәртіппен төлем алады. Оның мөлшері соңғы екі жылдағы табыстың 40 пайызы негізінде есептеледі. Отбасының А немесе В санатына жатуы жұмыс істейтін әйелдің бұл төлемді алу құқығына әсер етпейді.

Ал ресми жұмыс істемеген, үй шаруасымен айналысқан әйелдер үшін тәртіп өзгереді. 2027 жылдан бастап оларға жәрдемақы отбасы мемлекеттік қолдауға мұқтаж болған жағдайда ғана беріледі.

«Егер отбасы мұқтаждар санатына жатпаса, әйел еңбекке қабілетті, денсаулығында мәселе болмаса және отбасының күнкөріске жеткілікті табысы болса, А және В санатындағы әйелдер бұл қолдауды ала алмайды», – деді депутат.

Ләззат Қожахметтің нақтыланған дерегінше, қазір А және В санатындағы 30 мыңнан астам әйел осындай төлем алып отыр. Алайда бұл олардың барлығы 2027 жылдан бастап жәрдемақыдан айырылады дегенді білдірмейді. Төлем отбасының мемлекеттік қолдауға мұқтаждығына қарай қаралады.

Депутат 2027 жылдан бастап әлеуметтік төлемдерге қатысты басқа да өзгерістер енгізілетінін айтты. Соның ішінде әскери немесе құқық қорғау органдарында қызмет етіп, мерзімінен бұрын зейнетке шыққан азаматтарды жұмыссыз ретінде тіркеуге және бала күтіміне байланысты төлемді ер адамдарға тағайындауға қатысты тәртіп өзгереді.

Қожахметтің айтуынша, 2027 жылғы 1 қаңтардан бастап бала бір жарым жасқа толғанға дейінгі жәрдемақы тек әйелдерге беріледі. Сондай-ақ жұмыс орнында денсаулыққа келтірілген зиянға байланысты төлемдерге де өзгеріс енгізіледі.