Қазақстан Орталық Азияда бірінші болып жаңа халықаралық бастамаға қосылды: ол не береді?

Қазақстан 2031 жылға дейін металдар мен минералдар саласына 20 млрд долларға дейін қаржы тартуды көздеп отыр. Ел Дүниежүзілік банк тобының Metals and Minerals Compact бастамасына Орталық Азияда бірінші болып қосылды, деп хабарлады Үкімет.

Қазақстанның бастамаға ресми қосылу рәсімі 16 қазанда Таиландта Дүниежүзілік банк тобы мен Халықаралық валюта қорының жыл сайынғы жиындары аясында өтті. Қазақстан тарапынан оған Ұлттық геологиялық қызметтің басқарма төрағасы Ерлан Ғалиев қатысты.

Дүниежүзілік банктің мәліметінше, Қазақстан әзірлеген жоспар заңнаманы жетілдіру, экологиялық және әлеуметтік талаптарды күшейту, геологиялық мәліметтерді цифрландыру, минералдарды өңдеуге инвестиция салу және мамандар даярлау арқылы 2031 жылға дейін 20 млрд долларға дейін қаржы тартуды көздейді.

Яғни мақсат тек кен өндіріп, оны шикізат күйінде сатумен шектелмеу. Қазақстан минералдарды ел ішінде өңдеп, қосылған құны жоғары өнім шығаруды арттыруды жоспарлап отыр. Өнеркәсіп және құрылыс министрі Ерсайын Нағаспаев та әріптестік минералдарды өңдеу мен қосылған құны жоғары өндірісті дамытуға бағытталатынын мәлімдеді. 

Қазақстан мен Дүниежүзілік банк бірлесіп әзірлеген елдік жоспар 2026–2030 жылдарға арналған. Ол Дүниежүзілік банк тобының қаржылық, талдамалық және техникалық қолдауын біріктіреді. Құжат Қазақстанның 2029 жылға дейінгі Ұлттық даму жоспарына, геология саласын дамыту тұжырымдамасына және сирек әрі сирек кездесетін металдар саласын дамыту жоспарына негізделген.

Қазақстанмен бірге бұл бастама аясында Аргентина, Боливия, Мысыр, Үндістан, Малави, Мавритания және Замбия өз жоспарларын таныстырды. Дүниежүзілік банк 2026–2030 қаржы жылдары металдар мен минералдар саласына қолдау көлемін бес есе арттырып, 19 млрд долларға жеткізуді жоспарлап отыр. Бұл қаражаттың барлығы Қазақстанға берілмейді: ол Дүниежүзілік банктің осы бағыттағы жалпы халықаралық қолдау көлемі.