Зеленскийдің ескертуінен кейін Қазақстан Ресейге рейстерді тоқтата ма?

Қазақстанның Азаматтық авиация комитеті Украина президенті Владимир Зеленскийдің Ресей әуе кеңістігінің қауіпсіздігіне қатысты ескертуінен кейін бұл елге рейстерді тоқтату жоспары бар-жоғын нақтыламады. «Власть» басылымының сауалына ведомство Қазақстан мен Ресей арасындағы әуе қатынасы жалғасып жатқанын хабарлаған.

Комитет мәліметінше, қазір Қазақстан мен Ресей арасында аптасына шамамен 156 әуе рейсі орындалады. Оның 47-сін SCAT және Qazaq Air әуе компаниялары жүзеге асырады.

«Әуе компаниялары ұшу қауіпсіздігін қамтамасыз ету үшін қажетті шараларды қабылдап жатыр. Азаматтық авиация саласындағы уәкілетті ұйым әуе компанияларымен бірлесіп, жағдайды тұрақты түрде бақылауда ұстайды. Жолаушылар мен экипаж қауіпсіздігі – ұшу кезіндегі басты басымдық», – делінген комитет жауабында.

Алайда ведомство Ресейге рейстерді тоқтату немесе шектеу мәселесі қарастырылып жатыр ма деген сауалға тікелей жауап бермеген.

Бұған дейін, 2 қыркүйекте Украина президенті Владимир Зеленский әуе компанияларына Ресейдің әуе кеңістігі іс жүзінде жабылып, ұшуға толықтай қауіпсіз болмайтынын ескерткен.

Оның айтуынша, Украина азаматтық авиация мен жолаушылар ұшақтарына қауіп төндірмейді. Алайда Ресей аумағындағы ұшқышсыз ұшу аппараттарының саны әуе қатынасына әсер ететін деңгейге жетуі мүмкін.

Қазақстандық әуе компаниялары Таяу Шығыстағы жағдайға байланысты кей бағыттардағы рейстерін тоқтатқан. Air Astana Алматы мен Астанадан Дубайға рейстерді 30 қыркүйекке дейін орындамайтынын хабарлаған. FlyArystan да Ақтау – Дубай – Ақтау бағытындағы рейстерді қыркүйектің соңына дейін тоқтатқан.