Ұлттық қордан 5 трлн теңге жұмсалады, бірақ актив азаймайды – Ұлттық банк төрағасы

Қазақстан Ұлттық қорының активтері Үкімет 5 трлн теңге жұмсағанына қарамастан, 2029 жылға қарай өседі. Бұл туралы Ұлттық банк төрағасы Тимур Сүлейменов брифингте мәлімдеді.

25 тамызда Үкімет 2027–2029 жылдары Ұлттық қордан алынатын қаражаттың жалпы көлемін 5 трлн теңгеге ұлғайтқаны хабарланған еді. Қаражат әлеуметтік, коммуналдық, энергетикалық және көлік инфрақұрылымы нысандарын қаржыландыруға бағытталмақ.

Сүлейменовтің айтуынша, бағдарламада жауапты тараптар, қаржы көлемі, мерзімдер және басқа да көрсеткіштер нақты белгіленеді. Ол Ұлттық қордан қаражат алу қор активтеріне теріс әсер етпейді деп есептейді.

«5 трлн теңге алынады. Бірақ сонымен бірге мұнай компаниялары пайдалы қазбаларды өндіру салығын, роялтиді және Ұлттық қорға түсетін басқа да салықтарды төлеуді жалғастырады. Біз басқарушы ретінде қаражатты басқарып, бағалы қағаздарға салынған инвестициялардан табыс табамыз. Сондықтан Үкіметтің әлеуметтік-экономикалық даму болжамына сәйкес, Ұлттық қор активтері 2029 жылға қарай азаймайды, керісінше өседі», – деді Ұлттық банк төрағасы.

Бұған дейін, 28 тамызда Құрылтайдың алғашқы сессиясында Президент Қасым-Жомарт Тоқаев ұзақ мерзімді әлеуметтік-экономикалық әсері бар стратегиялық маңызды жобаларды қаржыландыруға Ұлттық қор қаражаты да тартылатынын айтқан.