Тоқаев Қауіпсіздік Кеңесінің жаңа құрамын бекітті

Президент Қасым-Жомарт Тоқаев Қазақстан Қауіпсіздік Кеңесінің жаңа құрамын бекітті. Кеңеске Мемлекет басшысын қоса алғанда 13 адам енді.

Қауіпсіздік Кеңесіне Президент Қасым-Жомарт Тоқаев төрағалық етеді. Жаңа құрамға Вице-Президент Ерлан Қарин, Қауіпсіздік Кеңесі Төрағасының орынбасары Аида Балаева, Құрылтай төрағасы Айбек Дәдебай, Премьер-Министр Олжас Бектенов, Президент Әкімшілігінің төрағасы Роман Скляр кірді.

Сондай-ақ Қауіпсіздік Кеңесінің құрамында Бас прокурор Берік Асылов, Ұлттық қауіпсіздік комитетінің төрағасы Ермек Сағымбаев, Мемлекеттік күзет қызметінің бастығы Сәкен Исабеков, Сыртқы істер министрі Мұхтар Тілеуберді, Қорғаныс министрі Дәурен Қосанов, Ішкі істер министрі Ержан Сәденов және Төтенше жағдайлар министрі Мұрат Мұханов бар.

Бұл жолы Төтенше жағдайлар министрі Қауіпсіздік Кеңесінің құрамына алғаш рет енгізілген.

Бұған дейін, 29 тамызда Тоқаев мемлекеттік басқару жүйесін одан әрі жетілдіру туралы Жарлыққа қол қойған. Құжатқа сәйкес, Қауіпсіздік Кеңесінің Аппараты Президентке тікелей бағынатын және есеп беретін мемлекеттік орган ретінде бекітілді.

5 қыркүйекте Қауіпсіздік Кеңесі Аппаратының басшылығы да тағайындалды. Мұрат Баймұқашев Аппарат Басшысы болды. Нұржан Каджиақбаров оның бірінші орынбасары, Руслан Жақсылықов пен Геннадий Зуев орынбасарлары болып тағайындалды.

Қауіпсіздік Кеңесі Президентке ұлттық қауіпсіздікті қамтамасыз ету, елдің қорғаныс қабілетін нығайту, заңдылық пен құқықтық тәртіп саласындағы мемлекеттік саясатты іске асыру жөнінде ұсыныстар енгізеді. Кеңес құрамын Президент жасақтайды.