Шымкентте белгісіз сұйықтықтан 22 адам уланып қалды

Шымкентте белгісіз сұйықтықтың иісінен 22 адам уланып қалды, деп хабарлайды Qrnews.kz тілшісі 24kz-ке сілтеме жасап.

Оқыс оқиға Еңбекші ауданындағы тұрғын үй секторы аумағында орын алды. Куәгерлер жүк көлігіне тиелген 800 литрлік темір бөшкеден сұйықтық төгіліп, газ бен бу ауаға тарағанын айтады. 

Зардап шеккендер токсикология орталығына жеткізілген. Дәрігерлерлік тексерістен кейін бәрін үйлеріне жіберген. 

Экологтар мен санитарлық-эпидемиологиялық бақылау департаментінің мамандары сұйықтық төгілген аумақтан сынама алып, зертханалық талдаулар жүргізді. Талдау нәтижесіне сүйенсек, ауада аммиак, пропан, метан, көмірсутекті мұнай газының артық мөлшері бар. Зерттеу қорытындысы жақын арада белгілі болады. 

"Жалпы 13 науқас жедел-жәрдеммен, қалған науқастар өз бетінше бізге келіп көмекке жүгінді. Соның ішінде біз 9 науқасқа стационарлық ем көрсеттік. Олардың бәрі үйлеріне амбулаторлық учаскелік дәрігерлердің бақылауына қайтарылды. Қазіргі таңда ешқандай қауіп жоқ", – деді қалалық гипербарикалық оксигенация орталығының бас дәрігері Мәдина Ермағанбетова.