ШҚО-да түнде жер сілкінді

6 қыркүйек күні сағат 23:08-де Шығыс Қазақстан облысында жер сілкінісі тіркелді. Бұл туралы Төтенше жағдайлар министрлігінің баспасөз қызметі хабарлады.

Жер сілкінісінің ошағы Қазақстан аумағында, Алматыдан солтүстік-шығысқа қарай 875 шақырым жерде орналасқан. Ошақтың координаттары – солтүстік ендіктің 49,167 және шығыс бойлықтың 84,417 градусы.

Шығыс Қазақстан облысындағы Үлкен Нарын ауылында жер сілкінісінің есептік қарқындылығы 2 балл болған.

Дүмпуден кейін «Қазселденқорғау» мамандары өзен арналары мен гидротехникалық құрылыстарды, сондай-ақ көшкін және сел қаупі бар учаскелерді тексерді. Зақым анықталған жоқ.

Тіршілікті қамтамасыз ету нысандары да тексерілген. ТЖМ мәліметінше, қираған немесе бүлінген нысандар жоқ, олардың барлығы қалыпты жұмыс істеп тұр.

Зардап шеккендер туралы ақпарат түскен жоқ. Өңірдегі жағдай тұрақты.