Руслан Берденовке оқ атқан Ернаp Жиембайдың әйелі болған оқиғаға қатысты үн қатты

Шымкент қаласы әкімінің орынбасары Руслан Берденовке жасалған қастандық бойынша күдікті Ернар Жиембайдың жұбайы Луиза Алданова Instagram парақшасында мәлімдеме жасады.

Луиза Алданова күйеуінің жаза басқанын атап өтіп, өзінің еш қатысы жоқ екенін айтты.

"Өткен бір ай біздің отбасымыз үшін де ауыр сынақ болды. Әрбір минут, әр сағат, әр тәулік уайымдаумен болдық, жапа шеккен Руслан Берденов мырзаның амандығын тіледік. Жуырда ғана ем-домын алып, ауруханадан үйіне оралғанын естідік. Енді ертерек айығып, елге қызметін жалғастыруын тілейміз", — деп жазды ол.

Алданова күйеуі екеуінің қарапайым, отбасын бірінші орынға қоятын жандар екенін, жаман іске бармайтындарын жазды.

"Десе де, Ернарымыз жаза басқан екен, қателескен екен... Мен бұл жағдайды тағдырдың сынағы деп қабылдап, барынша сабырмен қарап отырмын. Барлығын Алланың қолына тапсырдым. Ана ретінде, тек басымыздың амандығын, бауырымыздың бүтіндігін тілеймін", – деп бөлісті ол.

Сонымен қатар Алданова бастапқыда тараған «өзінің де қатысы бар» деген қауесетті үзілді-кесілді жоққа шығарды.

"Ата-анадан көрген тәрбием, бойға сіңген иманым мұндай арсыз қылыққа аттап бастырмайтыны айдан анық", — деді ол.

Еске салайық, Ернар Жиембай сәуір айында Шымкент қаласы әкімінің орынбасарына шабуыл жасады деген күдікпен ұсталған болатын. Руслан Берденов ауыр жараланып, ауруханада ем қабылдады. Қазір ол үйіне шыққан. Тергеу амалдары жалғасып жатыр.