«Қытайдан озықпыз»: Трамп жасанды интеллект дамуын баяулатуға қарсы шықты

АҚШ Президенті Дональд Трамп жасанды интеллектіні дамыту қарқынын қауіпсіздікке байланысты баяулату туралы ұсыныстарды қолдамайтынын айтты. Ол мұндай алаңдаушылықтың бір бөлігі тым асыра көрсетіліп отыр деп есептейді. Трамп бұл пікірін 13 қыркүйекте Ирландиядағы сапары кезінде білдірді.

Трамптың айтуынша, қажет болған жағдайда жасанды интеллект компанияларына белгілі бір шектеулер енгізуге болады. Алайда ол бұл саладағы тәуекелдерге байланысты айтылып жүрген кейбір болжамдардың жүзеге асуы екіталай деп санайды.

«Біз жасанды интеллект саласында Қытайдан озықпыз. Біз әлемдегі ең озық елміз және осы орынды сақтап қалғым келеді. Өйткені жасанды интеллект жарысында жеңген ел түбінде басым болады», – деді Трамп.

Жасанды интеллект қаупі туралы пікірталас күшейді

Трамптың мәлімдемесі АҚШ-та жасанды интеллектінің ықтимал қаупі қызу талқыланып жатқан тұста айтылды. Anthropic басшысы Дарио Амодеи жасанды интеллект дамуын баяулатып, қауіпсіздік шараларын күшейтуге шақырған. Оның ұсыныстарын OpenAI басшысы Сэм Альтман мен кәсіпкер Илон Маск та қолдаған.

Сэм Альтман бұған дейін жасанды интеллектінің адамзатқа қауіп төндіру ықтималдығын елемеуге болмайтынын айтып, OpenAI компаниясының 2026 жылы қор нарығына шығу жоспары кейінге қалдырылатынын мәлімдеді.

Трамп болса АҚШ-тың Қытаймен технологиялық бәсекеде алда қалуын маңызды деп санайды. Оның пікірінше, жасанды интеллектіні тым қатты тежеу Вашингтонның осы саладағы басымдығына кері әсер етуі мүмкін.