Бұрынғы министр Асхат Оралов «Әділет» партиясының басшылығына келді

Бұрынғы мәдениет және спорт министрі Асхат Оралов «Әділет» партиясы төрағасының орынбасары болып тағайындалды. Сонымен қатар Нұрсұлтан Байтілесов пен Елдар Жұмағазиев те партия төрағасының орынбасары қызметіне кірісті.

Асхат Оралов партия қызметін бақылау, талдау және бағалау бағытына жауап береді. Нұрсұлтан Байтілесов құқықтық және заң шығару мәселелерін, ал Елдар Жұмағазиев экономика, салалық және өңірлік даму бағытын үйлестіреді.

Асхат Оралов бұған дейін Павлодар облысы әкімінің орынбасары, ақпарат және қоғамдық даму вице-министрі, Астана әкімінің орынбасары, мәдениет және спорт министрі, Президент әкімшілігінің мемлекеттік инспекторы қызметтерін атқарған. Жаңа қызметке дейін Маңғыстау облысы әкімінің бірінші орынбасары болды.

Нұрсұлтан Байтілесов еңбек жолының басым бөлігін сот жүйесінде өткізген. Аудандық сот маманынан Қазақстанның Сот әкімшілігі басшысының бірінші орынбасарына дейінгі қызметтерді атқарды. Сондай-ақ VIII сайланған Мәжіліс депутаты болды.

Елдар Жұмағазиев бұған дейін Атырау облысының ішкі саясат саласында еңбек етіп, «Атырау – Ақпарат» өңірлік ақпарат мекемесін басқарған. Сондай-ақ «Атамекен» Ұлттық кәсіпкерлер палатасында басшылық қызметтер атқарған және партиялық жұмыста тәжірибесі бар.

Бұған дейін «Әділет» партиясы төрағасының орынбасарлары болып Әлия Адамбаева, Ержан Жылқыбаев және Қаныш Төлеушин тағайындалған. Олар тиісінше байланыс, идеологиялық жұмыс және цифрландыру бағыттарына жауап береді.