Аймағамбетов МӘМС жүйесіндегі мемлекетке артық шығын келтіретін процедураларды жоюды ұсынды

Қазақстанда Міндетті әлеуметтік медициналық сақтандыру (МӘМС) жүйесіндегі қосымша шығындар мен бюрократиялық кедергі тудыратын медициналық процедураларды қысқарту ұсынылды. Бұл туралы Мәжіліс депутаты Асхат Аймағамбетов мәлімдеді.

Депутаттың айтуынша, қазіргі таңда медицина саласындағы кейбір қайталанатын міндетті талаптар мемлекеттік бюджетке салмақ түсіріп, науқастар мен дәрігерлерге артық жүктеме болып отыр. Мәселен, мүгедектікті қайта растау кезінде науқастың денсаулық жағдайы қайтымсыз әрі созылмалы болса да, оны медициналық-әлеуметтік сараптамаға жіберу үшін ауруханаға міндетті түрде жатқызу талап етіледі. Бұл ретте азаматтар дәрігерге жазылып, талдаулар тапсырып, портал арқылы кезекке тұруға мәжбүр. Нәтижесінде емделушілер уақытын жоғалтса, МӘМС жүйесінен негізсіз қаражат жұмсалады. Мәжілістің бейінді комитеті бұл мәселені Денсаулық сақтау және Еңбек және халықты әлеуметтік қорғау министрліктерімен бірлесе талқылап, заңнамалық актілерге тиісті өзгерістер енгізу арқылы шешімін тапты.

Сонымен қатар депутат онкологиялық стационарларға жатқызу алдында жүрек патологиясы болмаса да, ЭКГ, эхокардиография және кардиолог консультациясынан міндетті түрде қайта өту талабын мысалға келтірді. Мәселен, Қарағанды қаласындағы онкологиялық орталықта жыл сайын 17 мыңға жуық госпитализация жүргізіліп, мыңдаған қайталама тексерулер жасалады. Мұндай қайталанатын процедуралар орындалмаған жағдайда медициналық ұйымдарға Әлеуметтік медициналық сақтандыру қоры тарапынан айыппұлдар салынады.

Асхат Аймағамбетов тиімсіз процедураларды жай ғана электрондық форматқа көшіру мәселені түбегейлі шешпейтінін атап өтті. Оның орнына медициналық зерттеу нәтижелерінің жарамдылық мерзімін бірнеше айға дейін ұзартып, қайта тексерулерді тек медициналық көрсеткіштер бойынша жүргізу ұсынылуда. Депутат денсаулық сақтау жүйесіндегі бұл олқылықтарды жою бағытында заңнамалық реформалар әзірлеуді жалғастыратынын білдірді.