Алматыда Қала күні: 200 тоннадан астам алма ұсынылған ауқымды жәрмеңке басталды

Алматыда жыл сайын Қала күні мерекесіне орай ұйымдастырылатын дәстүрлі Алма жәрмеңкесі өз жұмысын бастады. Мерекелік сауда сөрелері Қазыбек би көшесінің Панфилов пен Назарбаев көшелері аралығындағы бөлігінде орналасқан. Іс-шара тұрғындар мен қала қонақтарын таңғы сағат 10:00-ден бастап қабылдауда.

Биылғы экологиялық және өңірлік өнімдер жәрмеңкесі екі күнге созылады. Шараға аграрлық сектор өкілдері мен жергілікті шаруа қожалықтары алманың 50-ге жуық түрлі сортын алып келген. Мерекелік сауда алаңына жалпы көлемі 200 тоннадан астам өнім жеткізілген.

Алманың отаны саналатын Алматы шаһарында бұл шара халық үшін маңызды әлеуметтік-мәдени оқиғалардың біріне айналған. Жыл сайын ұйымдастырылатын жәрмеңке тұрғындардың отбасымен бірге уақыт өткізуіне, сондай-ақ ішкі және шетелдік туристердің өңірдің брендтік өнімімен танысуына мүмкіндік береді.

Қала тұрғыны Айдана бұл шараның отбасылық дәстүрге айналғанын атап өтті:

«Алма жәрмеңкесі – балаларымызбен бірге асыға күтетін дәстүрлі мерекелердің бірі. Мұнда алманың сан алуан түрін көріп қана қоймай, дәмін татып, өзімізге ұнаған сорттарды сатып аламыз. Балаларымыз да жыл сайын жәрмеңкеге келіп, жаңа сорттардың дәмін көруге қуанады. Осындай шаралардың ұйымдастырылуы қала тұрғындары үшін де, қонақтар үшін де өте жағымды», – деді ол.

Сонымен қатар халықаралық меймандар мен шетелдік туристер де іс-шараның ұйымдастырылу деңгейіне жоғары баға беріп, қала әкімдігіне алғыстарын білдіруде. Туристер Алматының тарихи символы саналатын алма өнімдерінің сапасы мен дәмін ерекше атап өтті.

Қала күніне арналған Алма жәрмеңкесі 19-20 қыркүйек аралығында сағат 10:00-ден 18:00-ге дейін жұмысстейді.