Трамп балалар екпесін бес бөлікке бөлуді ұсынды

АҚШ Президенті Дональд Трамп фармацевтикалық компаниялардан балаларға арналған кейбір вакциналарды бірден емес, бес бөлек дозаға бөліп шығаруды талап етуді жоспарлап отырғанын мәлімдеді. Ақ үй басшысының сөзінше, вакцинаны әр алты ай сайын аз мөлшерде бөліп егу балалар арасындағы аутизм жағдайларын едәуір азайтуға мүмкіндік береді. Десе де, ғылыми қауымдастық пен медицина сарапшылары бұл тұжырымды әлдеқашан теріске шығарып, вакцинация мен аутизм арасында ешқандай байланыс жоқ екенін бірнеше рет дәлелдеген болатын, деп хабарлайды Reuters.

Сопақ кабинетте өткен баспасөз жиынында Президент өз ұсынысының ғылыми негіздемесін немесе дәлелдемелерін келтірген жоқ. Сонымен қатар, нақты қай вакцина түрлерінің дозасы қысқартылатыны да белгісіз. «Бұдан былай препаратты денеге аз мөлшерде енгізу үшін егуді бес дозаға бөліп, алты айлық аралықпен жүргізуді ұсынамыз», - деп атап өтті Дональд Трамп.

Бұл - АҚШ әкімшілігінің балаларды вакцинациялау саясатына енгізген алғашқы өзгерісі емес. Бұған дейін Мемлекет басшысы балаларға егілетін міндетті екпелер санын 11-ге дейін шектейтін атқарушы жарлыққа қол қойған еді. Аталған құжат аясында бұрын кешенді түрде берілетін қызылша, паротит және қызамыққа қарсы вакциналарды жеке-жеке егу тапсырылған. Алайда қазіргі уақытта АҚШ-та мұндай жекеленген вакциналардың ресми лицензиясы жоқ, ал сарапшылардың айтуынша, оларды әзірлеп, қолданысқа енгізу үшін жылдар қажет болуы мүмкін.

Аталған бастамалар вакцинаға қарсы ұстанымымен танымал Денсаулық сақтау министрі кіші Роберт Ф. Кеннедидің бұрыннан келе жатқан мақсаттарын жүзеге асыруға бағытталған.