Трамп Ресей мен Украина энергетикалық бітімге келді деп мәлімдеді

АҚШ Президенті Дональд Трамп Ресей мен Украина бір-бірінің энергетикалық нысандарына соққы жасамауға келіскенін мәлімдеді. Алайда Украина Президенті Владимир Зеленский Киевтің мұндай қадамға белгілі бір шарттар орындалғанда ғана дайын екенін айтты. Ресей Трамптың мәлімдемесіне әзірге пікір білдірген жоқ.

«Украина Ресейдің энергетикалық нысандарына соққы жасамауға келісті. Ресей де дәл солай жасауға келісті», – деп жазды Трамп Truth Social желісінде.

АҚШ Президенті әлемде дизель отынының қымбаттауын да Ресей мен Украина арасындағы соғыспен байланыстырды. Бір күн бұрын Трамп Зеленскийді Ресейдегі дизель өндіруге қатысы бар нысандарға шабуылды тоқтатуға шақырған еді. Оның айтуынша, мұндай соққылар әлемдік нарықта отын тапшылығын күшейтіп отыр.

Зеленский: Серіктестерден нақты ұсыныс күтеміз

Владимир Зеленский кейінірек Украинаның ұстанымын түсіндірді. Оның сөзінше, Киев энергетикамен ғана шектелмей, халықтың күнделікті тіршілігін қамтамасыз ететін маңызды инфрақұрылымды түгел қамтитын ұзақ мерзімді әрі сенімді келісім болғанын қалайды.

Оған энергетика нысандарымен қатар порттар, жүк тасымалы, азық-түлік және басқа да маңызды инфрақұрылым кіруі керек.

Зеленский Украина Ресейдің мұндай келісімді сақтайтынына сенімді емес екенін де айтты. Сондықтан Киев АҚШ пен басқа серіктестерден Мәскеудің келісімді орындайтынына қатысты нақты кепілдік күтеді.

«Серіктестерден нақты ұсыныс күтеміз», – деді Зеленский.

Ол маңызды инфрақұрылымға өзара соққыны тоқтату соғысты бәсеңдететін және бейбітшілікке бастайтын алғашқы қадам болуы мүмкін екенін айтты. Reuters мәліметінше, Киев АҚШ Мәскеудің келісімді шынымен орындайтынына кепілдік берсе, өз тарапынан соққыларды тоқтатуға дайын.

Келісім әлі түпкілікті бекітілмеген болуы мүмкін

Financial Times журналисі Кристофер Миллер Киевтегі келіссөздерге қатысы бар дереккөздеріне сүйеніп, Трамп энергетикалық бітім туралы мәлімдеме жасауға асыққан болуы мүмкін екенін жазды. Оның мәліметінше, келісім бойынша жұмыс жүріп жатыр, бірақ әзірге оны түпкілікті жасалған мәміле деп айтуға болмайды.

Reuters те Зеленскийдің Трамп жариялаған келісімді ресми түрде растаған жоқ екенін жазады. Украина тарапы ұзақ мерзімді және сенімді тетік қажет екенін айтып отыр.

Ресей Трамптың Ресей мен Украина энергетикалық нысандарға өзара соққыны тоқтатуға келісті деген мәлімдемесіне әзірге ресми жауап берген жоқ.