АЖАРЛЫ АЛМАТЫ: МИЛЛИОНДАР БӘЙГЕСІ, СҮЗГІДЕН ӨТКЕН ТУЫНДЫЛАР ЖӘНЕ БАСТЫ ҮЗДІК ТАНЫЛҒАН СУРЕТ

Сүйікті шаһардың әсем де тылсым тынысы бұл жолы кенеп бетінде жаңаша сипатта жанданды. Қала күні қарсаңында Алматыда алғаш рет ұйымдастырылған «Ажарлы Алматы» республикалық байқауы шынайы өнер сүйер қауымды таңғалдырмай қоймады. Еліміздің түкпір-түкпірінен жиналған қылқалам шеберлері осы мегаполистің өзіндік келбетін паш етуге жан салды.

Бұл жай ғана байқау емес, нағыз шеберлер арасындағы тартысты тартыс болды. Ұйымдастырушылар тарапынан белгіленген 10,5 миллион теңгелік қомақты жүлде қоры ел аузында үлкен серпіліс тудырды. Өтінім қабылдау кезеңінде ұсынылған 168 жұмыстың ішінен тек ең үздік, бірегей идеясымен дараланған 109 туынды гана қазылар алқасының қатаң сүзгісінен өтіп, екінші кезеңге жолдама алды.

Жеңімпаздарды марапаттау салтанаты 16 қыркүйекте Алматы Галереясында өтіп, байқаудың қорытынды көрмесі шымылдығын түрді. Шара барысында қала әкімінің орынбасары Абзал Нүкенов бұл жобаның шаһар басшысы Дархан Сатыбалдының тікелей бастамасымен жүзеге асқанын атап өтіп, қатысушыларға шынайы алғысын білдірді.

Сарапшылардың шешімімен бас жүлде мен бірінші орынды «Алматы – қиял әлемі» атты ерекше туындысымен Нұрболат Асқар қанжығасына байлады. Екінші орынды Нұрлан Қилыбаев («Ару қала») мен Максим Ведерников («Бабье лето») өзара бөліссе, үшінші орын Жалғас Тілеуқабыл мен Құмар Омарханға бұйырды. Сонымен қатар, тағы бес суретші арнайы ынталандыру сыйлықтарына ие болды.

Сұлулыққа толы бұл туындыларды 23 қыркүйекке дейін Достық даңғылы, 44 мекенжайындағы Алматы Галереясынан тамашалауға болады. Тіпті, 19-20 қыркүйек күндері мерекелік бағдарлама аясында ең үздік жұмыстар Абай алаңына шығарылып, қала тұрғындары мен қонақтарына ашық аспан астында ұсынылады.