Абай облысының жастары жасанды интеллект көмегімен қосымша жасап үйренді

Семейде жастарға заманауи цифрлық дағдыларды үйретуге бағытталған «SKILLUP» жобасының алғашқы кезеңі өтті. Үш күндік оқу барысында қатысушылар смартфонмен контент жасаудан бастап, жасанды интеллект көмегімен анимация, инфографика және цифрлық қосымша әзірлеуге дейінгі тәжірибелік дағдыларды меңгерді. Алғашқы үш сабаққа 100-ден астам жас қатысты. 

Ұйымдастырушылар оқу бағдарламасын қатысушылар алған білімін бірден іс жүзінде қолданып көретіндей етіп әзірлеген. Сондықтан сабақтар теориялық түсіндірумен шектелмей, жастардың өздері фото және бейне түсіріп, материал өңдеп, жасанды интеллект құралдарын пайдаланып, цифрлық өнім жасауына басымдық берілген. 

Алғашқы күн смартфонмен контент жасауға арналды. Контент өндіруші Қуаныш Омар қатысушыларға смартфон арқылы сапалы фото және бейне түсіру, кадр құру, контентті өңдеу мен бейне құрастырудың негізгі тәсілдерін көрсетті. Жастар алған білімін сол жерде тәжірибеде қолданып, өздері контент әзірледі. 

Екінші күні жасанды интеллект мүмкіндіктеріне басымдық берілді. Семей қаласындағы Astana Hub филиалының басшысы, кәсіпкер Әнет Тұрсынжан жасанды интеллект арқылы анимация жасау және деректерді көрнекі түрде ұсыну бойынша тәжірибелік сабақ өткізді. Қатысушылар жаңа құралдардың көмегімен анимация әзірлеуді, ақпаратты көрнекі пішінде ұсынуды және идеяны цифрлық өнімге айналдыру жолдарын меңгерді. 

Сабақ барысында дайын өнімді аудиторияға дұрыс таныстыру және оны нарыққа ұсыну жолдары да талқыланды. Осылайша, жастарға жасанды интеллект құралдарын пайдалану ғана емес, оның көмегімен жасалған өнімді әрі қарай дамыту және ұсыну тәсілдері көрсетілді. 

Үшінші күні қатысушылар жасанды интеллект көмегімен өз цифрлық өнімдерін жасауға кірісті. IT саласының халықаралық сарапшысы Асхат Мұқанов жасанды интеллект арқылы мәтін және цифрлық өнім әзірлеу тақырыбында сабақ өткізді. Жастар жасанды интеллектіге тапсырманы дұрыс әрі тиімді құруды, мәтін, инфографика және басқа да цифрлық материалдар жасауды үйренді. 

Бұдан бөлек, қатысушылар «vibe coding» тәсілін пайдаланып, өз мамандығы мен қызығушылығына сәйкес цифрлық қосымшалар жасап көрді. Осы арқылы олар идеяны ойластырудан бастап, оны нақты цифрлық өнімге айналдыруға дейінгі үдерісті тәжірибе жүзінде өтті.

Жобаның басты ерекшеліктерінің бірі – жастарға жаңа технологиялар туралы ақпарат берумен ғана шектелмей, оларды күнделікті жұмыста қолдануға болатын нақты құрал ретінде пайдалануды үйрету. Үш күн ішінде қатысушылар контент әзірлеп, бейне құрастырды, жасанды интеллект көмегімен анимация жасады, деректерді көрнекі түрде ұсынды және өздерінің цифрлық өнімдерін әзірледі. 

«SKILLUP» үш күндік оқумен аяқталмайды. Жоба бір айға жоспарланған. Алдағы кезеңдерде жастардың цифрлық сауатын арттыруға, жасанды интеллект мүмкіндіктерін тиімді пайдалануға және қазіргі еңбек нарығында қажет тәжірибелік дағдыларын дамытуға бағытталған жұмыстар жалғасады. 

«SKILLUP» жас мамандарды оқыту және қолдау жобасы Абай облысының жастар саясаты мәселелері басқармасының мемлекеттік әлеуметтік тапсырысы аясында «Болашақ» корпоративтік қорының ұйымдастыруымен жүзеге асырылып жатыр.