Жаңа вирус па, әлде маусымдық сырқат па: Қазақстанда қыркүйек айында қанша адам сырқаттанып қалды

Әлеуметтік желілерде Астана, Алматы және басқа да ірі қалалардың тұрғындары әлсіздік, жөтел мен тамақтың ауруына шағымданып, бұл белгілерді «белгісіз жаңа вируспен» байланыстыруда. Желідегі бұл талқылаулар халық арасында түрлі қауесеттердің тарауына түрткі болды. Алайда Денсаулық сақтау министрлігі эпидемиологиялық жағдайға қатысты ресми мәлімдеме жасап, мәселенің анық-қанығын түсіндірді.

Денсаулық сақтау министрлігінің дерегіне сүйенсек, күз басталғалы елде бұрын белгісіз болған ешқандай жаңа вирус түрі тіркелген жоқ. Керісінше, қыркүйек айының басынан бері ЖРВИ (ОРВИ) диагнозы 51 937 адамға қойылған. Бұл өткен жылдың ұқсас кезеңімен салыстырғанда 1,8 есеге аз. Ал тұмау (грипп) жұқтыру жағдайлары мүлдем тіркелмеген.

Коронавирусқа қатысты да жағдай тұрақты. COVID-19 басқа да респираторлық вирустар сияқты таралып жатқанымен, сырқаттану деңгейі төмендеген. Жыл басынан бері елде 87 адамнан ғана коронавирус анықталды, бұл былтырғы көрсеткіштен 10,3 есеге аз.

Денсаулық сақтау министрлігі елдегі жағдайды апта сайын бақылауда ұстап отыр. Мамандар дене температурасы көтеріліп, жөтел мен тамақ ауруы байқалса, үйде қалып, дәрігерге көрінуге кеңес береді. Сонымен қатар бөлмені жиі желдетіп, қолды жүйелі жуу, адам көп жиналатын жерлерден аулақ болу сияқты қарапайым гигиена ережелерін сақтауды ескертеді.