Отбасы банк ислам ипотекасының қашан іске қосылатынын айтты

Отбасы банк өкілдері халық арасында үлкен сұранысқа ие болып отырған ислам ипотекасына қатысты соңғы жаңалықтарды бөлісті. Банк басшылығының мәліметінше, бұл бағытты бастауға мүмкіндік беретін заңнамалық түзетулер қабылданғанымен, пайызсыз бағдарламаны бірден іске қосу әлі де мүмкін болмай тұр.

Орталық коммуникациялар қызметінде өткен брифингте банк төрағасының орынбасары Жансұлтан Матай заңнамалық өзгерістердің 21 қазанда күшіне енетінін мәлімдеді. Дегенмен, ислам ағымдағы шоттары мен пайызсыз депозиттерді ашу үшін банкке ең алдымен арнайы лицензия алу қажет.

«Ислам ипотекасын беру үшін Құрылтай депутаттарымен бірлесіп, қосымша өзгерістерді қарастыруымыз керек. Қазіргі уақытта бірінші кезекте лицензия алу үшін корпоративтік шешімдер қабылданып жатыр», - деді банк өкілі.

Сонымен қатар банкте бұл саладағы саясатты айқындайтын исламдық қаржыландыру қағидаттары жөніндегі кеңес құрылмақ. Осы себепті нақты қай күні ипотека беріле бастайтынын кесіп айту әлі ерте. Еске сала кетейік, бұған дейін Отбасы банк басшысы Ләззат Ибрагимова пайызсыз баспана бағдарламасы 2026 жылдың қазанында пайда болуы мүмкін екенін хабарлаған еді.