Семей қаласында Қала күніне арналған мерекелік апталық өтті

Абай облысының орталығы Семей қаласында «Семейді сүю – тарихқа бас ию!» тақырыбы аясында Қала күніне арналған мерекелік апталық жоғары деңгейде өтті. Жеті күнге созылған мерекелік бағдарлама аясында мәдени, спорттық және танымдық бағыттағы 20-дан астам ауқымды іс-шара ұйымдастырылып, оған 150 мыңға жуық қала тұрғыны мен қонақтары қамтылды.

Мерекелік апталық барысында ұлттық спорт түрлерін ұлықтау мен бұқаралық спортты дамытуға ерекше көңіл бөлінді. Тұрғындар арасында дүбірлі бәйге, «Семей батыры» турнирі, сондай-ақ аударыспақ, қол күресі, гір тасын көтеру және арқан тартыс бойынша тартысты сайыстар өткізілді. Мұнымен қатар, салауатты өмір салтын дәріптеу мақсатында «TUNGI RUN – SEMEY» түнгі жүгіру марафоны ұйымдастырылып, тұрғындардың белсенді қатысуымен өтті. Мерекелік бағдарламаны балалардың өнер байқауы, қолөнер жәрмеңкелері мен түрлі спорттық жарыстар одан әрі толықтырды.

Апталықтың қорытынды шарасы Қарағайлы шағынауданындағы Республика алаңында өткен ауқымды Open Air гала-концертімен аяқталды. Салтанатты кеште отандық танымал өнерпаздар Тұрар Ыдырыс, Айдана Меденова, AYREE, Ернар Амандықпен бірге арнайы шақырылған шетелдік эстрада жұлдыздары -  AMIRCHIK (Қырғызстан), NANA DARKMAN (Германия) және ARSENIUM FROM O-ZONE (Молдова) өнер көрсетті. Мерекелік кешті Жазира Еркін мен DAKE жүргізді.

Тұрғындар мен қала қонақтарына қолайлы жағдай жасау мақсатында гала-концерттің тікелей көрсетілімі Арбат аумағында және Мұхтар Әуезов алаңында орнатылған арнайы экрандар арқылы көрсетілді. Ауқымды мерекелік іс-шара салтанатты отшашумен қорытындыланды.