Тоқаев Оңтүстік Кореямен бейбіт атом бойынша серіктестік орнатуды ұсынды

Қазақстан Оңтүстік Кореямен арадағы тауар айналымын екі есеге арттырып, инвесторларға «ресурсты технологияға айырбастау» формуласы бойынша жұмыс істеуді ұсынды. Бұл туралы Мемлекет басшысы Қасым-Жомарт Тоқаев екі елдің іскер топ өкілдері қатысқан домалақ үстел барысында мәлімдеді.

Президенттің айтуынша, кейінгі отыз жылда екі ел арасында берік экономикалық байланыс орнаған. Былтыр өзара сауда айналымы 3 миллиард доллардан асса, Кореядан тартылған тікелей инвестиция көлемі 12 миллиард долларға жеткен. Қазіргі таңда елімізде кореялық капиталы бар мыңнан астам компания, соның ішінде Samsung, Kia, Hyundai және Shinhan Bank сияқты алыптар табысты жұмыс істеп жатыр.

Тоқаев ынтымақтастықтың ең маңызды бағыты ретінде критикалық шикізат пен сирек металдарды игеруді атап өтті. Осы мақсатта Алматыда Сирек және сирек жер металдары саласындағы технологиялық ынтымақтастық орталығын құру жоспарланып отыр.

Бұдан бөлек, Мемлекет басшысы атом энергетикасы саласындағы серіктестікке ерекше тоқталды. Әлемдегі ең ірі уран өндіруші ретінде Қазақстанның бейбіт атомды дамытуда әлеуеті зор екенін айтқан Президент, әсіресе шағын модульдік реакторлар бойынша Оңтүстік Кореямен тығыз әрі өзара тиімді әріптестік орнатуға дайын екенін жеткізді.