Адвокат Санжар Боқаевтың соты қашан басталатынын айтты

Қоғам белсендісі Санжар Боқаевқа қатысты сот отырысы 28 қыркүйекте басталады. Істі Алматы қаласының Алмалы аудандық соты қарайды. Бұл туралы оның адвокаты Радмир Өтепов Instagram парақшасында хабарлады.

Адвокаттың сөзінше, сот отырысы ашық өтеді.

«Сот хатшысы бізге отырыстың ашық өтетінін хабарлады», – деп жазды Өтепов.

Санжар Боқаев биыл 18 наурыздан бері қамауда отыр. Тергеу нұсқасы бойынша, ол әлеуметтік желілерде қоғамдық саябақ аумағындағы ағаштардың заңсыз кесілуі және құрылыс нысандарындағы мүліктің ұрлануы туралы бейнематериалдар жариялаған. Тергеу мұны жалған ақпарат таратып, қоғамда теріс пікір қалыптастыру мақсатында жасалған деп санайды.

Сондай-ақ тергеу Боқаев ағаштарды кесуді өзі ұйымдастырып, қаржыландырды және бұл іске сыйақы беруге уәде етіп, табысы төмен адамдарды тартты деп есептейді.

Бұл – тергеу тарапының нұсқасы. Боқаевтың кінәлі немесе кінәсіз екеніне қатысты түпкілікті шешімді сот шығарады.