«Жалған тіркеуге» тосқауыл: Алматыда тұрғындарды тіркеу ережесі өзгерді

Алматы қаласында тұрғылықты жері және уақытша жүрген жері бойынша тіркеу ережелеріне өзгерістер енгізілді. Енді азаматтарды тіркеу кезінде баспананың көлемі ескеріледі: бір адамға тұрғын үйдің жалпы ауданынан кемінде 15 шаршы метр қарастырылуы тиіс.

Жаңа норматив бір мекенжай бойынша тым көп азаматты тіркеу жағдайларын шектеуге және шаһардағы халықтың нақты саны туралы мәліметтердің дәлдігін арттыруға бағытталған. Сонымен бірге 15 шаршы метр талабы әрбір тұрғынға мұндай көлемде жеке баспана беру міндеті болып табылмауы тиіс. Бұл - тек тіркеу жүргізу кезінде қолданылатын есептік көрсеткіш.

Бұл шектеу баспана иесінің отбасы мүшелері мен жақын туыстарына қолданылмайды. Белгіленген нормативтен тыс үй иесінің жубайын, балалары мен олардың отбасын, жақын туыстарын, сондай-ақ асырауындағы, қамқорлығындағы немесе қорғаншылығындағы тұлғаларды тіркеуге рұқсат етіледі.

Тиісті шешімді Алматы қаласы мәслихатының сессиясында Еңбек және әлеуметтік бағдарламалар басқармасының басшысы Бауыржан Жаубасов таныстырып, депутаттар жобаны қолдады. Жаңа норматив тіркеу есебін тәртіпке келтіруге және әр ауданда нақты қанша адам тұратынын дәлірек түсінуге мүмкіндік береді. Бұл мектептерге, емханаларға, коммуналдық және басқа да қалалық инфрақұрылымға түсетін салмақты жоспарлау үшін маңызды.

Алматы қаласының мәслихаты мұндай нормативті белгілеу құқығына 2026 жылғы 14 қыркүйекте күшіне енген «Алматы қаласының ерекше мәртебесі туралы» Заңға өзгерістер енгізілгеннен кейін ие болды. Жаңа тәртіп жалған тіркеу жағдайларын азайтуға және қала халқының саны туралы мәліметтердің шынайылығын арттыруға септігін тигізеді деп күтілуде.