Қытайға кіру тәртібі өзгерді: қазақстандықтар нені білуі керек

Қытайда 15 қыркүйектен бастап шетелдіктердің елге кіруі мен шығуына қатысты жаңартылған талаптар күшіне енді. Енді шекарадан өткен кезде құжаттар мен саяхатшы ұсынған мәліметтер мұқият тексеріледі. Осыған байланысты көші-қон бақылауынан өтуге бұрынғыдан көбірек уақыт кетуі мүмкін.

Жаңа тәртіп бойынша саяхат мақсаты, қонақүй, сапар бағыты және кері қайту билеті туралы берілген мәлімет шындыққа сай болуы керек. Шекара қызметкерлері электрондық броньдарды да тексере алады. Алайда барлық шетелдік туристің телефонын міндетті түрде тексеру талабы енгізілген жоқ.

Жалған құжат ұсынған немесе өзі туралы көрінеу жалған мәлімет берген шетелдікке Қытайға кіруге бір жылдан бес жылға дейін тыйым салынуы мүмкін.

Сонымен қатар Қытай билігі шетелге сапарлау кезіндегі қауіп-қатер туралы ескерту жүйесін жетілдірмек. Тиісті мемлекеттік органдар басқа елдердегі ахуал мен туристік бағыттардағы қауіпсіздікке қатысты ескертулерді жедел жариялап отыруға тиіс.

Қазақстандықтарға қандай кеңес беріледі?

Қытайға баратын қазақстандықтарға төлқұжатының жарамдылық мерзімін және сапарға қажет басқа да құжаттарды алдын ала тексерген жөн. Қонақүй броні, сапар бағыты мен кері қайту билеті туралы мәліметтердің де дұрыс болғаны маңызды.

Әуе компаниялары жолаушыларға төлқұжат және көші-қон бақылауына қосымша уақыт кетуі мүмкін екенін ескертіп, әуежайға ұшуға кемінде үш сағат қалғанда келуге кеңес береді.

Қазақстан мен Қытай арасындағы визасыз тәртіп өзгерген жоқ. Қазақстан азаматтары Қытайда бір сапар барысында 30 күнге дейін визасыз бола алады.

2025 жылы Қазақстанға келген қытайлық туристер саны 962 мыңға жеткен. Бұл 2024 жылмен салыстырғанда 47 пайызға көп.