2027 жылы Қазақстандағы орташа зейнетақы қанша болады

2027 жылы Қазақстандағы орташа жиынтық зейнетақы мөлшері шамамен 170 740 теңге болады деп болжанып отыр. Бұл есепке Бірыңғай жинақтаушы зейнетақы қорынан төленетін жинақтаушы бөлік кірмейді, деп хабарлады Еңбек және халықты әлеуметтік қорғау министрлігі Informburo.kz сауалына берген жауабында.

Министрліктің алдын ала есебінше, 2027 жылы орташа ынтымақты зейнетақы 111 640 теңге, ал базалық зейнетақы 59 100 теңге болады.

Қазір, 2026 жылғы 1 тамыздағы жағдай бойынша, Қазақстандағы орташа жиынтық зейнетақы 197 446 теңге. Оның ішінде ынтымақты зейнетақы – 103 389 теңге, базалық зейнетақы – 54 034 теңге, ал жинақтаушы зейнетақы – 40 043 теңге.

2026 жылы ең төменгі жиынтық зейнетақы 104 645 теңге, ең жоғарысы 238 412 теңге болып отыр.

Зейнетақы 8,5 пайызға өсуі мүмкін

2027–2029 жылдарға арналған республикалық бюджет жобасында 2027 жылғы 1 қаңтардан бастап жасына байланысты және еңбек өтілі үшін төленетін зейнетақыны 8,5 пайызға арттыру көзделген.

Министрлік бұл көрсеткішті әлеуметтік-экономикалық даму болжамымен байланыстырды. 2027 жылы инфляция 7,5–9,5 пайыз шамасында болады деп күтіліп отыр.

Сонымен қатар 2027 жылдан бастап базалық зейнетақының ең жоғары мөлшерін ең төменгі күнкөріс деңгейінің 118 пайызынан 120 пайызына дейін көтеру жоспарланған.

Бюджет жобасында 2027 жылғы ең төменгі күнкөріс деңгейін 55 173 теңге деп белгілеу ұсынылған. Қазір бұл көрсеткіш 50 851 теңге.

БЖЗҚ-дан төленетін жинақтаушы зейнетақы төлемдері жыл сайын 5 пайызға индекстеледі.

Министрлік инфляция болжамнан жоғары болған жағдайда зейнетақыны жыл ішінде қайта көтеру мүмкіндігін де жоққа шығармайды. Мұндай тәжірибе 2022 жылы болған: сол жылы зейнетақы 1 қаңтарда және 1 сәуірде екі рет ұлғайтылған.