Жасанды интеллект министрлігі ұшақтардағы интернет қашан пайда болатынын айтты

Жақын арада қазақстандықтар ұшу кезінде де желіде қала алады. Жасанды интеллект және цифрлық даму министрлігі Телекоммуникациялар комитетінің төрағасы Дамир Сейсембеков Air Astana борттарында спутниктік интернет пайда болуы мүмкін екенін мәлімдеді.

Бұл бастаманы жүзеге асыру үшін заңнамалық база дайындалып, маусым айында Президент жарлығымен тиісті түзетулер қабылданған болатын. Қазіргі уақытта халықаралық Viasat және OneWeb компанияларымен бірлескен жоба белсенді түрде жүргізіліп жатыр.

«Біз Air Astana компаниясымен бұл мәселені тығыз қарастырудамыз. Алғашқы ұшақтарда интернет қазан айында пайда болады деп күтіп отырмыз», - деді Дамир Сейсембеков.

Ал әуедегі интернеттің бағасына келер болсақ, оны әуе компаниясының өзі белгілейді. Жауапты мекеме өкілінің айтуынша, Air Astana қазіргі таңда жолаушыларға ыңғайлы болу үшін түрлі нұсқаларды, соның ішінде бонустық жүйе мен адалдық бағдарламаларын қарастырып жатыр.