Қазақстан ЖИ саласында АҚШ пен Қытайдың бірін таңдай ма: вице-министр жауап берді

Қазақстан жасанды интеллект саласындағы ынтымақтастықта АҚШ пен Қытайдың бірін таңдауды көздеп отырған жоқ. Ел екі тараппен де жұмыс істеуге дайын. Бұл туралы Үкімет брифингінде QRNews тілшісінің сұрағына жауап берген Жасанды интеллект және цифрлық даму вице-министрі Ғиззат Байтұрсынов айтты.

Қазақстан бұған дейін АҚШ бастамашы болған Pax Silica және Қытайдың WAICO ұйымына қосылған. Осы тұста АҚШ тарапы алдағы уақытта Қазақстанға екі бағыттың бірін таңдауды ұсынуы немесе осындай талап қоюы мүмкін деген ақпарат тараған еді. QRNews тілшісі вице-министрден мұндай жағдай туындаса, Қазақстанның қай тарапты таңдайтынын сұрады.

«Сіздің сұрағыңызға келетін болсақ, бір елді таңдау деген мақсат жоқ. Барлық елдермен жұмыс істеуге дайынбыз», – деді Ғиззат Байтұрсынов.

Вице-министр АҚШ пен Қытайды жасанды интеллект саласында әлемдегі ең дамыған мемлекеттердің қатарына жатқызды. Оның айтуынша, бұл саланың дамуы үшін адами капитал, деректер және қуатты есептеу инфрақұрылымы маңызды.

«Бұл екі мемлекетті осы бағытта ең дамыған мемлекеттер деп айтсақ болады. Жасанды интеллект үш заттан тұрады: адами ресурстар, деректер, суперкомпьютерлер, яғни деректерді өңдеу орталықтары. Осы үш бағыт бойынша екі ел де өте мықты дамыған», – деді ол.

Байтұрсынов АҚШ-та NVIDIA, Қытайда Huawei технологиялары дамығанын атап өтті. Оның сөзінше, екі мемлекет те деректерді өңдеу орталықтарын, суперкомпьютерлерді, адами капиталды және үлкен тілдік үлгілерді дамытуға басымдық беріп отыр.

Осылайша, Қазақстан әзірге жасанды интеллект саласындағы әріптестікті бір мемлекетпен шектемей, АҚШ-пен де, Қытаймен де ынтымақтастықты жалғастыру ұстанымын білдірді.