Қазақстан әлемдегі бәсекеге қабілетті 40 экономиканың қатарына кірді

Қазақстан әлемдегі бәсекеге қабілетті экономикалар рейтингінде 38-орын алды. Ел 65,4 ұпай жинап, ТМД мемлекеттері арасынан тізімге енген жалғыз ел болды. Бұл IMD World Competitiveness Center орталығының 2026 жылғы зерттеуінде көрсетілген.

Швейцариялық орталық жыл сайын 70 елдің экономикасын төрт негізгі бағыт бойынша бағалайды. Олар – экономикалық көрсеткіштер, мемлекеттік басқару тиімділігі, бизнестің тиімділігі және инфрақұрылым.

Қазақстан мемлекеттік басқару тиімділігі бойынша 23-орын, бизнестің тиімділігі бойынша да 23-орын алды. Инфрақұрылым бойынша 43-орында, ал экономикалық көрсеткіштер бойынша 57-орында тұр.

Жалпы рейтингте Қазақстан Испания, Португалия, Польша, Италия және Түркиядан жоғары орналасты.

Сингапур көш бастады

2026 жылғы рейтингте Сингапур 100 ұпаймен бірінші орын алды. Одан кейін Гонконг пен Швейцария орналасқан. Алғашқы ондыққа Тайвань, Біріккен Араб Әмірліктері, Дания, Ирландия, Нидерланд, Швеция және АҚШ та кірді.

Зерттеудегі мәлімет бойынша, Қазақстанның жалпы ішкі өнімі 306,2 млрд долларды құрап, бұл көрсеткіш бойынша ел 44-орын алған.

Сатып алу қабілетінің тепе-теңдігі бойынша жан басына шаққандағы жалпы ішкі өнім 45,3 мың долларға жуықтады.

Қазақстанның нақты экономикалық өсімі 6,5 пайыз болған. Осы көрсеткіш бойынша ел зерттеуге енген мемлекеттер арасында алтыншы орынға шықты.

Сонымен бірге зерттеуде Қазақстандағы жұмыссыздық деңгейі 4,6 пайыз, ал тұтыну бағаларының өсуі 11,4 пайыз деп көрсетілген. Инфляция көрсеткіші бойынша Қазақстан 65-орында орналасқан.